Қонунга кўра, қорамол, қўй, эчки ва туялар туғилганидан 14 кун ўтгач, отлар 4 ойдан кейин, чўчқалар 1 ойдан кейин, итлар ва мушуклар эса 3 ойдан кейин идентификация қилиниши белгиланган. Бунда ҳайвонлар мазкур муддатлар тугаганидан сўнг бир ойдан кечиктирмай рўйхатдан ўтказилиши шарт.
Шунингдек, сақлаш ёки кўпайтириш мақсадида Ўзбекистонга олиб кирилган ҳайвонлар мамлакатга киритилган санадан эътиборан 21 кун ичида идентификация қилиниши керак.
Қонунда ҳайвон сўйилганда, нобуд бўлганда, ўлганда, йўқ қилинганда ёки мамлакат ташқарисига олиб чиқилганда, у етти кун ичида давлат ҳисобидан чиқарилиши ҳам назарда тутилган.
Ҳайвон эгасининг мурожаати асосида ваколатли давлат органи вакили беш иш куни ичида ҳайвонни идентификация қилиши ва давлат рўйхатидан ўтказиши лозим. Қонун ҳайвонлар ҳисоби ва уларнинг ҳаракатини ягона тизим орқали кузатишни таъминлашга қаратилган.
