Қонун лойиҳаси миграция соҳасидаги қонунчиликни такомиллаштиришга қаратилган бўлиб, мамлакатга чет элликларнинг кириши ва бу ерда бўлиши билан боғлиқ тартиб-таомилларни янада соддалаштириш ҳамда туризм ва хорижий инвестицияларни рағбатлантиришни кўзда тутади.
Қайд этилишича, ҳозирда 80 дан ортиқ давлат фуқаролари учун визасиз кириш тартиби амал қилади, электрон виза бериш тизими жорий этилган. Шунинг натижасида жорий йилнинг дастлабки беш ойида Ўзбекистонга ташриф буюрган хорижий туристлар сони 27 фоизга ошиб, 5,5 миллион нафарга етган.
Амалдаги қонунчиликка мувофиқ, чет эл фуқаролари ва фуқаролиги бўлмаган шахслар меҳмонхона, мотел, дам олиш масканлари, санаторийлар, давлат ва хусусий клиникалар ҳамда бошқа жойлаштириш муассасаларига келганида, қабул қилувчи ташкилотлар уларни дарҳол турган жойи бўйича рўйхатдан ўтказиши шарт.
Бироқ амалиётда айрим ташкилотлар ушбу мажбуриятни бажармаслиги, шунингдек, келган шахслар ҳақидаги маълумотларни E-mehmon ахборот тизимига киритмаслик ҳолатлари учраётгани қайд этилди. Шу муносабат билан қонун лойиҳасида бундай қоидабузарликлар учун жавобгарликни кучайтириш таклиф қилинмоқда.
Шунингдек, ҳужжат билан амалдаги қонунлар 2025 йил 10 июлда қабул қилинган «Ўзбекистон фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисида»ги қонунга мувофиқлаштирилмоқда.
Хусусан, бир қатор кодекс ва қонунларда қўлланилаётган «доимий яшаш жойи» ва «вақтинчалик яшаш жойи» атамалари тегишлича «яшаш жойи» ва «турган жойи» тушунчалари билан алмаштирилиши назарда тутилган.
Муҳокамалар давомида депутатлар қонун лойиҳасининг айрим нормаларини янада аниқлаштириш ва ҳуқуқни қўллаш амалиётини такомиллаштириш бўйича таклифлар билдирдилар. Якунларга кўра, қонун лойиҳаси биринчи ўқишда қабул қилинди.
