«Манчестер Сити» яримҳимоячиси, Испания миллий жамоаси аъзоси Родри «Барселона»га ўтади. Таниқли инсайдер Фабрицио Романо ушбу футболчи трансфери ҳал бўлганини маълум қилди.
Қиммат келишув
Манбанинг сўзларига кўра, барчаси келишиб олинган – «шаҳарликлар» «Барселона»нинг сўнгги таклифини қабул қилган. Романо аниқ рақамни келтирмаган, аммо, унинг айтишича, бу трансфер каталонияликларга 70 миллион еврога айланиши мумкин. Аввалроқ Испаниядаги Marca нашри «Олтин тўп» соҳиби бўлган 30 ёшли футболчи учун 60 миллион евро таклиф қилингани, яна 10 миллион евро бонуслар сифатида тўланиши мумкинлигини хабар қилганди. «Сити» эса футболчиси учун 80 миллион евролик нарх белгилаганди, аммо якунда ён беришга тўғри келган – 30 ёшли футболчининг шартномаси муддати якунига бир йил қолганди ва агар шу йил сотилмаса, кейинги ёзда текинга кетиши мумкин эди.
Каталонияликлар клуби Родрини сафига қўшиб олмоқчи экани ҳақидаги хабарлар анча олдин тарқалганди. Шу билан бирга, бу ёзда ушбу футболчига «Реал» асосий даъвогар бўлиб турганди – испаниялик футболчи ҳам Мадридга кўчиб ўтишга қарши эмасди, аммо «Барса»дан қизиқиш мавжудлигидан хабар топгач, фикрини ўзгартирди.
Родри – кўк-анорранглилар таркиби учун жиддий кучайиш ҳисобланади. У ғолиблик билан якунланган 2026 йилги жаҳон чемпионатида Испания миллий жамоасига сардорлик қилди. У турнирдаги барча ўйинларда, жумладан, Аргентинага қарши финал баҳсида ҳам иштирок этди ва чемпионлик учун катта ҳисса қўшди.
Ушбу ҳавбек «Манчестер Сити»нинг асосий футболчиларидан бири ва сардори эди – у Англияда ўтган 7 йил мобайнида барча турнирлар доирасида қарийб 300 ўйинда иштирок этиб, барча совринларни қўлга киритди, жумладан, 4 карра Англия чемпиони, ЕЧЛ ғолиби бўлди, 2024 йилда эса «Олтин тўп»га эга чиқди. Transfermarkt футболчини 55 миллион еврога баҳолаган.
Родри «Барса»га қанчалик керак?
Ҳанси Флик «Бавария»да ҳам, «Барселона»да ҳам соф таянч яримҳимоячисига кучли зарурат сезмаган. «Бавария»да у бу позицияда Тиаго Алкантара, Йозуа Киммиҳ ва Леон Горецка каби футболчиларни ўйнатиб кўрган. «Барселона»да эса асли олдинроқда ўйнашга ихтисослашган ҳавбек Френки де Йонгни орқароққа тушириш орқали масалага ечим топган, у ва Педри жуда яхши тандемга айланганди.
Нидерландиялик футболчи майдонга тушишга тайёр бўлмаган вақтларда мураббий Марк Касадо, Марк Бернал ёки Эрик Гарсияни навбатма-навбат таянч зонаси учун синаб кўрди. Лекин уларнинг ҳар бирида алоҳида камчиликлар бор эди: Касадо босим остида ўзини яхши ҳис қила олмайди, сўнгги мавсумда эса ўзининг муҳим хусусияти бўлган тўпсиз ўйнашда ҳам олдингидек эмаслиги кўриниб қолди; Бернал ҳужумларга яхши қўшилади, аммо таянч зонасини ишониш учун ҳали жуда тажрибасиз, у фақат соф таянч яримҳимоячисининг ёнида очилиши мумкин, ўзи асосий таянч яримҳимоячиси бўла олмайди; асли марказий ҳимоячи бўлган Эрик тўпсиз яхши ҳаракатланади, тўп билан эса жуда ишончсиз.
Бу позиция учун таркибдаги идеал вариант бўлган Гави ҳам бор, у ўтган мавсум охирида, де Йонгга дам берилганида ишончли ҳаракат қилганди, аммо 2023 йилдаги оғир жароҳатдан энди қайтган футболчига бутун мавсумни ишониб бўлмасди.
Шу тариқа, Френки де Йонг ЖЧ-2026 вақтида жиддий жароҳат олиб, узоқ муддатга сафдан чиққач, «Барселона»да сифатли таянч яримҳимоячисига эҳтиёж сезилди. Родри эса 30 ёшда эканига қарамай, бу позицияда ҳамон дунёнинг энг яхшиларидан бири бўлиб қолаётганини ўтган жаҳон чемпионатида исботлади.
Родри «Барселона»нинг ҳозирги таркибидаги бирорта яримҳимоячи эга бўлмаган скиллар тўпламига эга. У анча орқада жойлашганига қарамай, энг яхши плеймейкер бўлиши мумкин. Шу билан бирга, тўп рақибларда бўлганда позиция танлашда беназир. Унинг ҳимояланиш вақтида ўйинни ўқий олиш маҳорати – максимал даражада. Яқинда тугаган жаҳон чемпионати ўйинларида ҳам у рақиблардан доим бир қадам олдинда бўла олишини кўрсатди. Рақиблар қарор қабул қилишга улгурмасидан Родри уларни зарарсизлантиришга улгуради.
Флик ўз тизимида ҳеч нарсани ўзгартирмасдан, шунчаки Родрини таркибга қўшиши мумкин – шунинг ўзи «Барса» яримҳимоясини сезиларли даражада мустаҳкамлайди. У катта тажрибага эга бўлган ғолиб футболчи ва тўғридан тўғри майдондаги мураббий вазифасини бажара олади. Жамоа тўпга эгалик қилаётганида Родри жамоани тўғри бошқаришни ўз зиммасига олади: жамоадошларига қаерда таваккалчилик қилиш мумкинлигини, қаерда эҳтиёткор бўлиш кераклигини кўрсатиб туради. Тўп рақибда эканида унинг ўйинни ўқиш маҳорати олдинги чизиқдаги прессингда ҳам, таянч зонасида ҳимояланишда ҳам қўл келади. «Барса» таркибида бу ишни Родри каби қила оладиган футболчи йўқ.
«Барса» Родрини олгани учун «Реал» уни ололмади
Фото: Christian Bruna/Getty Images
Бу ёзда мадридликлар ўта фаол бўлишди – бу аллақачон жамоанинг сўнгги уч йилликдаги энг жиддий трансфер кампаниясига айланди. Родри жамоадаги ўзгаришларнинг муҳим қисми бўлиши ва бошқа трансферлар эффектини янада ошириши мумкин эди.
Қолаверса, у «Реал» яримҳимоясида Тони Кроос кетганидан кейин юзага келган асосий муаммони ҳал қилган бўларди – майдон марказида жамоа ўйинини ичкаридан туриб бошқарадиган футболчи йўқ. Крооссиз ўтган икки йил мобайнида айрим футболчилар бу вазифанинг бир қисмини ўз зиммасига олишга ҳаракат қилди. Дани Себалиос ва Арду Гулер навбати билан ортга қайтиб, ҳужумларни бошлаб беришди. Шунингдек, Арбелоа Тияго Питарч билан шундай тажрибани амалга ошириб кўрди. Аммо бу уринишларни тўла муваффақиятли чиқди, деб бўлмайди.
Родрининг ўйин услуби Кроосникига унчалик ўхшамайди, аммо орқа чизиқдаги плеймейкер ролиида у мадридликларга керакли сифатни бера олган бўларди. «Реал» тизими Родри ёрқин ўйинлар намойиш этган «Сити» ёки Испания миллий жамоаси моделига ўхшамайди, «Қироллик клуби»да ушбу ҳавбек ўз салоҳиятини тўлиқ намоён эта олиши бўйича билдирилган шубҳалар ҳам ўринли. Аммо шунисига шубҳа йўқки, «Реал» Родри билан жамоа сифатида кучлироқ бўлган бўларди.
«Барса» уни таркибига қўшиб олиш орқали, икки эмас, биртўла учта қуённи урмоқда: жамоа ашаддий рақибига майдон марказидаги муҳим муаммони ҳал қилишга йўл қўймади; футболчига у ўзини яхшироқ ҳис қилиши мумкин бўлган тизимни таклиф этди; ўзи эса муаммоли позициясига шу позициядаги энг кучли футболчилардан бирини қўлга киритди.
«Сити» энди унга ўринбосар изламоқда
«Шаҳарликлар» учун Родрининг кетиши – кўнгилсиз ҳолат. Ушбу яримҳимоячи хочсимон боғламидаги жароҳат туфайли 2024/25 йиллар мавсумининг катта қисмини ўтказиб юборганида ҳам «Сити» қийналиб қолганди. У йўқлигида Пеп Гвардиола жамоаси жуда кўп ўйинларда ютқазган, жумладан Чемпионлар лигаси плей-офф босқичида «Реал»га қарши икки ўйинни ҳам бой берганди.
Испаниялик мутахассис ўша оғир даврда Родрининг жамоадаги ўрнини аргентиналик Лионел Мессининг «Барселона»даги ўрни билан таққослаганди.
«Бизга Родри етишмаяпти – жаҳоннинг энг яхши футболчиси. Месси энг яхши футболчиси бўлган «Барселона»даги давримизни тасаввур қилинг, аммо биз ўша мавсумда Леосиз ўйнар олардик», – дея иқрор бўлганди Гвардиола.
Энди «Сити»да янги саҳифа – 55 ёшли мутахассис 10 йиллик фаолиятидан кейин клубни тарк этди. Мураббийлик креслосини унинг шогирди ва собиқ ёрдамчиси Энцо Мареска эгаллади – ва унга ҳам Родри кетгани маъқул эмас. Англия Суперкубоги учун «Арсенал»га қарши кечган ва йирик ҳисобдаги мағлубият билан якунланган ўйиндан кейин (0:3) италиялик мутахассис очиқчасига шундай деди:
«У яқинда жаҳон чемпионатида ғолиб чиққанди, «Олтин тўп» соҳиби. У ҳар қандай жамоага керак бўлган юқори даражали футболчи».
Мареска жамоада ички захиралар мавжудлигини айтганига қарамай, «Сити» Родрига ўринбосар қидирмоқда. Ҳозирча асосий номзод – «Лилл»даги 18 ёшли Айюб Буадди. Марокашлик яримҳимоячи Франция миллий чемпионати (у 2025/26 йиллар мавсумида барча турнирлар доирасида 42 ўйин ўтказди) ва миллий жамоада (ЖЧда 5 та ўйинда майдонга тушди) ўзини кўрсатиб, аллақачон топ-клублар назарига тушган. Аммо уни қўлга киритишга айнан «шаҳарликлар» яқинроқ, ОАВ маълумотларига кўра, инглизлар клуби аллақачон Буадди билан шахсий шартнома бўйича келишиб қўйган.
Шу билан бирга, бу трансферни расмийлаштиришга ҳали узоқ. «Лилл» ўз етакчиларидан бири билан шу мавсумнинг ўзида хайрлашмоқчи эмас, маҳаллий инсайдерларга кўра, клуб уни яна бир мавсум ижара асосида ўзида қолдириш вариантларини қидирмоқда. Қолаверса, Айюбнинг трансфер нархи ҳам кам эмас – Transfermarkt портали унинг трансфер нархини 80 миллион еврога баҳолаган, французлар клуби эса 100 миллион евро талаб қилмоқда. Шу туфайли «Сити» учун Родрига ворис топиш масаласи долзарб бўлиб турибди.
