Йил бошидан Ўзбекистонга 8 миллион хорижлик сайёҳ келди, уларнинг мамлакатда қолиш муддати 8 кунгача узайди. Бу ҳақда айтиб ўтган президент Шавкат Мирзиёев туризм ислоҳотлари аҳоли даромадида янада кўпроқ сезилиши кераклигини таъкидлади.
Тадбиркорлар билан мулоқотда маълум қилинишича, меҳмонхона қуриш, реконструкция қилиш ва жиҳозлаш учун 50 миллион доллар ресурс ажратилади. Тадбиркорларга 10 йил муддатга миллий валютада 16 фоизли кредит берилади.
Уч, тўрт ва беш юлдузли меҳмонхона қуриш учун субсидия бериш муддати яна икки йилга узайтирилади. Субсидия учун меҳмонхона “юлдузи”ни тасдиқлашда хорижий компания хулосасини талаб қилиш амалиёти бекор қилинади.
Меҳмонхоналар учун ер ва мулк солиғини 10 баробар кам ставкада тўлаш имтиёзи 2030 йилгача узайтирилади. 50 тадан кўп жойлаштирув ўрнига эга меҳмонхоналарга нақд валюта қабул қиладиган банкоматларни банкларнинг ўзи ўрнатиб беради.
Туроператорларнинг хорижлик туристларга кўрсатган хизмати экспортга тенглаштирилиб, қўшилган қиймат солиғидан озод қилинади.
Туристик автобус, электробус ва микроавтобуслар олиб келишдаги божхона имтиёзи яна бир йилга узайтирилади. Бундай транспорт воситалари учун утилизация йиғими ҳам ундирилмайди.
