Хитой ҳукумати автомобил ишлаб чиқарувчиларини ички текширувлар давомида машиналардаги нуқсонларни синчковлик билан аниқлашга ва ҳар қандай камчилик аниқланганда автомобилларни қайтариб олиш кампаниясини ўтказишга мажбур қилди. Бу ҳақда Reuters агентлиги Хитой назорат қилувчи органлари баёнотига таяниб хабар берди.
Бир йиллик дастур доирасида автоконцернлар ўз машиналарининг сифати ва ишончлилигини пухта текшириши, шунингдек, янги технологияларни бозорга чиқаришдан олдин хавфсизлигини синовдан ўтказиши керак бўлади. Шунингдек, ҳукумат ҳайдовчига ёрдам бериш тизимлари ва автопилот устидан назоратни кучайтиришни талаб қилди.
Компанияларнинг киберҳимоя, маълумотларни сақлаш ва шу каби соҳалардаги имкониятларига алоҳида эътибор қаратилади. Автомобил ишлаб чиқарувчилар ички текширувлар натижаларини 2026 йил охиригача маҳаллий ҳокимият органларига тақдим этиши шарт.
Агар ўз-ўзини текшириш жараёнида ишлаб чиқарувчи хавфсизликка таҳдид соладиган нуқсонни аниқласа, у ҳолда кечиктирмасдан назорат органига автомобилларни қайтариб олиш режасини тақдим этиши ва ихтиёрий кампания ташкил қилиши шарт. Маҳаллий ҳокимият органлари эса, ўз навбатида, брендлар устидан назоратни кучайтириши лозим.
