2 сентябр куни АҚШ Зарбхонаси Трамп тасвирланган бир долларлик коллекция тангасини чиқарди. Натижада у сўнгги юз йил ичида портрети Америка пулларида пайдо бўлган биринчи тирик АҚШ президентига айланди. Танга АҚШ 250 йиллигига бағишланган.
Зарбхона 25 тангадан иборат тўпламни 61 доллардан, 100 тангалик халтачани эса 154 доллар-у 50 центдан сотувга чиқарди. Орадан бир неча соат ўтгач, Зарбхона сайтида тангалар «айни пайтда мавжуд эмаслиги» ҳақида хабар пайдо бўлди.
Зарбхонанинг тушунтиришича, Трамп тасвирланган танга «ушбу тарихий маррани нишонлаш» доирасида чиқарилган ва «замонавий коллекцияларга ажойиб қўшимча» бўлиши кўзда тутилган. Тангалар Зарбхона сайтидан ташқари, Вашингтондаги савдо автоматларида ҳам сотилмоқда.
Улар тилла тангага ўхшайди, лекин аслида таркибида олтин йўқ: улар зарб қилинган қотишманинг 88,5 фоизи мисдан, қолгани эса рух, марганец ва никелдан иборат.
Жорий йилнинг май ойида АҚШ Ғазначилик котиби Скотт Бессент ўз идораси АҚШ 250 йиллиги муносабати билан Доналд Трампнинг сурати туширилган 250 долларлик банкнот чиқаришни режалаштираётганини эълон қилганди.
АҚШ федерал қонунчилиги пулларни тирик одамларнинг сурати билан безашни тақиқлайди. Трамп тарафдорлари Конгрессга ўз кумири учун истисно қилиш тўғрисидаги қонун лойиҳасини киритган, бироқ уни қабул қилиш жараёни тўхтаб қолган.
Скотт Бессент янги банкнот чиқариш режалари ҳақида маълум қилар экан, АҚШ президентининг портрети унинг ҳаётлигида Америка пулларида аввал ҳам пайдо бўлганини эслатди: бу АҚШ мустақиллигининг 150 йиллиги муносабати билан чиқарилган ярим долларлик тангадаги президент Келвин Кулиж эди. Унда иккита профил: Кулиж ва Жорж Вашингтоннинг сурати бўлган.
Президент Трампнинг тасвирини пулга жойлаштириш мумкинлигини исботлаш учун унинг маъмурияти биринчи президентлик даврида қабул қилинган «Муомаладаги коллекция тангаларини қайта расмийлаштириш тўғрисида»ги 2020 йилги қонунга ҳам таянган.
Ушбу қонун ҳозир ҳаёт бўлган одамларнинг тасвирини тангаларнинг орқа томонига (реверс) жойлаштиришни тақиқлайди, лекин олд томонига (аверс) эмас. Янги бир долларлик тангаларнинг айнан олд томонида Трампнинг портрети жойлаштирилган.
