Тянэ–Лунтан кўприги Хитойнинг Гуанси-Чжуан автоном райони, Хэчи шаҳар округи Тянэ уездидаги Хуншуй дарёси устидан қурилган.
Кўприкнинг асосий аркали оралиғи 600 метрни ташкил этади. Бу бетон аркали кўприклар учун аввалги 445 метрлик жаҳон рекордидан 155 метрга кўп.
Иншоотнинг умумий узунлиги 2 488,55 метр бўлиб, у тўрт тасмали автомобил ҳаракатига мўлжалланган — ҳар икки йўналишда иккитадан ҳаракат қатнови мавжуд. Кўприк 2024 йилда фойдаланишга топширилган.
Global Times маълумотларига кўра, Тянэ–Лунтан ҳозирда асосий оралиғи узунлиги бўйича дунёдаги энг йирик пўлат-темирбетон аркали кўприк сифатида қайд этилмоқда.
Лойиҳа август ойи охирида Гуанси провинциясининг фан ва техника соҳасидаги ютуқлари учун бериладиган энг юқори мукофотга сазовор бўлган. Ҳакамлар ҳайъати кўприк қурилишида қўлланилган муҳандислик ечимларига алоҳида эътибор қаратган.
Мутахассислар ўнлаб йиллар давомида 600 метрга яқин оралиққа эга бетон аркалар қуриш имкониятини ўрганиб келган. Жумладан, Япония, Хорватия ва кўприксозлик бўйича катта тажрибага эга бошқа давлатларда ҳам шундай лойиҳалар устида ишлар олиб борилган. Бироқ амалда қурилган кўприкларнинг оралиғи 390 метрдан ошмаган.
Бундай катта бетон арка қурилишидаги энг жиддий муаммо конструкциянинг ўз оғирлиги ҳисобланади. Маълумотларга кўра, Тянэ–Лунтан кўпригида унинг ўз вазни умумий юкламаларнинг 90 фоиздан ортиғини ташкил этади.
Бунда пўлат каркасни ўраб турган бетоннинг ўзи конструкция массасининг ярмидан кўпини ташкил қилган.
Шу сабабли муҳандислар арка конструкциясини қайта кўриб чиқиб, бетон миқдорини камайтиришга қарор қилган. Асосий арка иккита юк кўтарувчи қовурғага бўлинган, нисбатан кам юк тушадиган қисмлар эса конструкциядан чиқариб ташланган.
Натижада арканинг кенглиги 23 метрдан 13 метргача қисқартирилган. Бетон сарфи эса тахминан 40 минг куб метрдан 28 минг куб метрга туширилган.
Ҳисоб-китобларга кўра, янги конструкция асосий оралиқнинг ҳар бир метрига нисбатан 400 метр атрофидаги ўхшаш кўприкларга қараганда 22 фоиз кам бетон талаб қилади. Шу билан бирга, конструкциядаги кучланиш даражаси ўхшаш кўрсаткичда сақлаб қолинган.
Қурувчилар бетон қуйишнинг янги технологияларини ҳам ишлаб чиқишига тўғри келган. Катта ҳажмдаги бетон аркаларда ёриқлар пайдо бўлишини назорат қилиш муҳим ҳисобланади, чунки бетон қотиши жараёнидаги ҳарорат ўзгаришлари ва ички кучланишлар конструкцияга қўшимча юклама келтириб чиқариши мумкин.
