Абдуллоҳ Раззоқов ҳамда Исломбек Ўролов АҚШнинг Нью-Йорк шаҳрида ўтказилган NEO Science олимпиадасида биология ва математика фанлари бўйича юқори натижаларни қайд этиб, олтин медални қўлга киритди. Финалгача 10 мингдан ортиқ номзод орасидан сараланган ёш иқтидор эгалари якуний босқичда 32 давлатдан келган 600 нафардан ортиқ иштирокчи билан куч синашди ва якунда ғолиблар сафидан ўрин олди. Kun.uz мухбири билан суҳбатда йигитлар олимпиада қандай бўлгани ва тайёргарлик жараёнлари ҳақида гапириб берди.
NEO Science олимпиадасининг дастлабки босқичи декабрь ойида онлайн шаклда ўтказилган. Унда дунёнинг турли мамлакатларидан 10 мингдан ортиқ ўқувчи қатнашган. Саралашнинг кейинги босқичларида иштирокчилар сони қисқарган. Якуний, яъни Grand Final босқичи эса Нью-Йоркдаги Колумбия университетида ташкил этилган.
9-11-синф ўқувчилари математика, физика, кимё ва биология йўналишларида, 3–8-синф ўқувчилари эса математика ва табиий фанлар бўйича беллашган. Ўзбекистон номидан финалда жами тўртта мактабдан 25 нафардан ортиқ ўқувчи иштирок этган.
Математика йўналишида мамлакат шарафини ҳимоя қилган “Миллат Умиди” мактаби ўқувчиси Исломбек Ўроловнинг айтишича, олимпиада финалида 40 та савол тақдим этилган. Баҳолашда тўғри жавоб учун балл берилган, хато жавоб учун эса балл айирилган. Шу сабабли у ишончи комил бўлмаган саволларга тахминий жавоб белгилашдан кўра, уларни жавобсиз қолдиришни афзал кўрган.
“Олтин медаль олишни кутмагандим. Исмимни экранда чиқаришганда бошида ишонмадим. Чунки мендан кўпроқ меҳнат қилган ва яхшироқ тайёргарлик кўрган ўқувчилар бор деб ўйлагандим. Саҳнага чиқиб, медални қўлимга олганимдагина ушбу ютуқ реал эканини англадим. Ўша пайтда шу кунгача қилган барча тайёргарликларим ва сарфлаган вақтларим кўз олдимдан ўтди. Бу медаль мен учун шунчаки ғалаба эмас, ҳаракатларимнинг муносиб натижаси бўлди”, – дейди у.
Ўқувчиларнинг айтишича, NEO Science олимпиадасида қатнашиш ғояси уларга “Миллат Умиди” мактабидаги устозлари томонидан берилган. Педагоглар болаларга математика ва биология фанларидан халқаро танловда ўз билимларини синаб кўришни тавсия қилган. Шундан сўнг болалар бир неча ой давомида дарсдан ташқари машғулотларда тайёргарлик кўрган.
“Айрим масалалар устида узоқ вақт ишлашимизга тўғри келарди. Жавобни топишнинг ўзи етарли эмас, нима учун айнан шундай ечимга тўхтаганимизни тушунишга ҳаракат қилдик. Биринчи босқичдан кейин ўзимизга бўлган ишончимиз ҳам ошди. Grand Final’га йўлланма олганимизда эса тайёргарлигимизни халқаро даражада синаб кўриш имконияти пайдо бўлганини ҳис этдик. Энг муҳими, олимпиада менга қийин топшириқдан қўрқмаслик ва жавоб аниқ бўлмагунча изланишда давом этишни ўргатди”, – дейди Абдуллоҳ Раззоқов.
Икки ўқувчининг NEO Science олимпиадасидаги натижаси уларнинг халқаро танловлардаги илк ютуғи эмас. Исломбек бундан аввал SEAMO (Southeast Asian Mathematical Olympiad), German Math Olympiad , SASMO (Singapore and Asian Schools Math Olympiad) каби халқаро олимпиадаларда қатнашиб, бронза ва кумуш медалларини қўлга киритган.
Абдуллоҳ эса илмий изланишларга ҳам қизиқади. У устозлари билан ҳамкорликда турли мавзуларда мақолалар тайёрлаган. Жумладан, Даун синдроми билан яшаётган болалар ва улар дуч келаётган муаммоларга бағишланган материаллар устида ишлаган. Ўқувчининг айтишича, унинг айрим илмий ишлари АҚШ ва Буюк Британиядаги нуфузли журналларда чоп этилган.
Исломбек Ўролов ҳозир АҚШ ва Германиядаги нуфузли университетларга ҳужжат топшириш учун портфолиосини шакллантирмоқда. У IELTS имтиҳонидан 7.0, SAT’дан эса 1410 балл олган. Унинг келажакдаги режалари бизнес билан боғлиқ. Абдуллоҳ Раззоқов Германияда тиббиёт бўйича таълим олиб, кейинчалик Ўзбекистонга қайтиш ва халқаро стандартларга жавоб берадиган клиникалар ташкил этишни мақсад қилган.
Ёш иқтидор эгалари билан интервьюни тўлиқ ҳолда Kun.uz’нинг YouTube’даги саҳифасида томоша қилишингиз мумкин.
