Мактабгача ва мактаб таълими вазирлиги ҳамда Олий таълим, фан ва инновациялар вазирлиги педагогик фаолият билан боғлиқ лавозимлар рўйхатига ўзгартириш ва қўшимчалар киритишни назарда тутувчи қарор лойиҳасини ишлаб чиқди.
Ҳужжат «Педагогнинг мақоми тўғрисида»ги қонунга мувофиқ тайёрланган.
Лойиҳа билан 2026 йил июнь ойида тасдиқланган Педагогик фаолият билан боғлиқ лавозимлар рўйхатини кенгайтириш таклиф этилмоқда.
Хусусан, рўйхатга «Мактабгача таълим ташкилотида тарбиячи ёрдамчиси» лавозимини киритиш назарда тутилган.
Шу билан бирга, ҳужжатда ушбу лавозимнинг хусусий мактабгача таълим ташкилотлари учун тавсиявий хусусиятга эга бўлиши белгиланмоқда.
Бундан ташқари, рўйхатнинг 30-позициясини янги таҳрирда баён этиш таклиф қилинган. Унга кўра, мазкур позицияда «Ҳуқуқшунослик бўйича профессор-ўқитувчи» лавозими кўрсатилади.
Қарор лойиҳаси Президент ҳузуридаги Ижтимоий ҳимоя миллий агентлиги, Камбағалликни қисқартириш ва бандлик вазирлиги, Спорт вазирлиги, Маданият вазирлиги, Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Савдо-саноат палатаси билан келишилган.
Лойиҳага кўра, қарор қабул қилинса, у расмий эълон қилинган кундан эътиборан кучга киради.
