Флорида штатидаги Майами аэропортида Boeing 767-300 русумли юк самолёти қўниш чоғида учиш-қўниш йўлагидан чиқиб кетди. Самолёт автомобил тураргоҳига кириб кетган ва ёна бошлаган.
«Биз камида беш киши ҳалок бўлганини тасдиқлаймиз», – деди Майами-Дейд округи мэри Даниэлл Левин Кава матбуот анжуманида. Унинг сўзларига кўра, беш киши турли даражадаги тан жароҳатлари билан маҳаллий шифохонага ётқизилган. Шундан уч нафари оғир аҳволда қолмоқда.
Майами полицияси вакили бир неча киши ўз автомобилларида қамалиб қолгани, уларни қутқарувчилар олиб чиқишига тўғри келганини айтган.
Рейс 21 Air авиакомпанияси томонидан амалга оширилган – бу Amazon’га тегишли юк самолётлари операторидир. Самолёт Пуэрто-Рикодан учиб келганди.
CNN телеканалига кўра, учувчилар қўнишдан олдин ердаги хизматларни бортдаги қандайдир носозлик ҳақида огоҳлантирмаган.
Телеканал эътибор қаратишича, ушбу аэропортда EMAS (Engineered Material Arresting System) йўқ – бу учиш-қўниш йўлагининг охирида самолётни нисбатан хавфсиз тормозлаш имконини берувчи махсус қоплама.
Очиқ манбаларга кўра, N1997A регистрация номерига эга Boeing 767-33AER самолёти 1994 йилда ишлаб чиқарилган.
Аввалига у Белгиядаги Sobelair авиаташувчисига етказиб берилган, 2016 йилда эса юк самолёти сифатида қайта жиҳозланган.
Лайнер Майами аэропортининг 30-полосасига қўниши керак бўлган, унинг узунлиги – 2 853 метрни ташкил этади. Аэропортда жами тўртта учиш-қўниш йўлаги мавжуд.
Flightradar24 сервисига кўра, йўлакдан ташқарига чиқиб кетаётганида самолёт 112 узел тезликда (соатига 207 км) ҳаракатланган.
Ҳодисадан кейин аэропорт ёпиб қўйилган, натижада кўплаб рейслар кечиктирилган ёки бекор қилинган. Кейинроқ аэропорт фаолияти тикланди, аммо йўловчилар кечикишлар бўлиши мумкинлиги ҳақида огоҳлантирилган.
