АҚШ транспорт вазири Шон Даффи якшанба куни Флорида штатининг аҳоли яшаш туманларидан бирида бизнес-жет қулаб тушгани ҳақида хабар берди. Унинг бортида бўлган тўққиз кишининг барчаси ҳалок бўлган.
Диспетчерлик хизмати билан музокаралар ёзувида экипаж аъзоларидан бири ўртача турбулентлик ҳақида хабар бергани эшитилади. Шундан сўнг лайнер тезда баландликни йўқота бошлаган ва деярли тик ҳолатда ерга урилган. Флорида губернатори ҳалокатни ракета тушишига ўхшатган.
Авиаҳалокат Шимолий Америка Шарқий соҳил вақти билан соат 12:50 да (Тошкент вақти билан 21:50) Крестҳейвен яқинида рўй берган – бу ердан президент Доналд Трампнинг Палм-Бичдаги Мар-а-Лаго қароргоҳигача 14 км чиқади.
АҚШ Федерал фуқаро авиацияси бошқармаси (FAA) маълум қилишича, ҳаво кемаси Техас штатининг Остин шаҳридан ҳавога кўтарилган ва Баҳама оролларига кетаётганди.
Вазир Даффи воқеани «даҳшатли фожиа» деб атади ва FAA Миллий транспорт хавфсизлиги кенгаши (NTSB) томонидан ўтказилаётган терговга ёрдам бериш учун воқеа жойига мутахассислар гуруҳини юбораётганини айтди.
«Бу даҳшатли кадрлар, – дейди журналистларга Флорида губернатори Рон Десантис. – Бу ракета қулагандек эди: кучли портлаш ва парчалар ҳар томонга сочилиб кетган».
Парвоз таҳлили шуни кўрсатадики, қулашдан олдин лайнер тезлик билан пастлаган – секундига юзлаб фут тезликда.
Ҳалокатдан бироз олдин диспетчерлик хизмати билан ўтказилган суҳбат ёзувида экипаж аъзоларидан бири «ўртача турбулентлик» юзага келгани ва «ичкари совиб кетгани» ҳақида хабар бергани эшитилади. Кейин бу одам самолёт «ёғингарчилик зонасига тушаётгани» ва «баландликка кўтарилиш кераклиги»ни айтади.
Бироз ўтиб бу овоз самолёт дақиқасига 10 минг фут (3048 метр) тезликда пастлаётганини хабар қилган.
Экипаж аъзоси фавқулодда ҳолат ҳақида эълон қилиб, шундай бақирган: «Биз рухсат этилган тезликдан ошиб кетдик, дақиқасига 20 минг фут тезликда пасаймоқдамиз». Кейин эса шундай қўшимча қилган: «Биз ҳозир ерга уриламиз».
