7 сентябрдан Паркент-Тошкент-Паркент йўналишида шаҳарлараро электропоезд қатнови йўлга қўйилди. Бу ҳақда “Ўзбекистон темир йўллари” АЖ матбуот хизмати хабар берди.
Маълум қилинишича, 2025 йил январ ойида бошланган “Байтқўрғон – Паркент” темирйўл линияси қурилиши якунланган. Лойиҳа доирасида узунлиги 24 км бўлган электрлаштирилган темирйўл, 3 дона темир-бетон кўприк, 1 дона автомобил йўл ўтказгич, 76 дона сув ўтказиш иншооти ҳамда 16 дона автомобил йўли ва темирйўли кесишмаси барпо этилган. Шунингдек, 50 ўринли “Паркент” темирйўл бекати қурилган.
Электропоездда 586 та ўрин бўлиб, 1154 тагача йўловчи ташиш имкони бор.
Чипталар нархи катталар учун 10 минг сўмгача, 10 ёшгача бўлган болаларга 6,5 минг сўм қилиб белгиланган. Йўловчилар манзилга 50 дақиқада етиб боришлари мумкин.
Мазкур йирик лойиҳа Паркент туманининг туристик салоҳиятини оширишга ҳам хизмат қилиши кутилмоқда.
