Британиянинг The Telegraph газетаси Politico билан ҳамкорликда ўтказган суриштирув натижаларига таяниб, Хитой давлат компанияси Россияга камикадзе-дронлар ишлаб чиқариш учун зарур материалларни яширин равишда етказиб берганини хабар қилди.

Журналистлар танишган Россиянинг ички ҳужжатларига кўра, компонентлар Россияда «Герань» дронларини ишлаб чиқариш билан боғлиқ компанияга етказилган. Россия қўшинлари ушбу узоқ масофали дронлардан Украинага зарбалар беришда фойдаланади.

Ҳужжатларни Украина хавфсизлик ва ҳамкорлик маркази (USCC) Россиядаги манбалардан олгани ва кейинчалик АҚШ ҳамда Буюк Британия ҳукуматларига тақдим этгани айтилмоқда.

Юк фуқаролик маҳсулоти сифатида расмийлаштирилган

Суриштирувда келтирилган ҳужжатларга кўра, Хитойнинг Jilin Chemical Fiber Group давлат компанияси Россияга углерод толаси ишлаб чиқариш учун 46 тонна полиакрилонитрил хомашёси етказиб берган.

Юкни «Росатом» давлат корпорациясининг замонавий материаллар ва композитларга ихтисослашган Umatex бўлинмаси таркибидаги «Алабуга-Волокно» компанияси қабул қилган.

USCC тадқиқотига кўра, «Алабуга-Волокно» Россияда узоқ масофага учувчи камикадзе-дронларни оммавий ишлаб чиқариш учун юқори мустаҳкамликдаги углерод толасини етказиб беради. Гап Эроннинг Shahed дронлари асосида яратилган Россия дронлари ҳақида кетмоқда.

Украина томони тақдим этган ҳужжатларнинг ҳақиқийлиги АҚШ, Буюк Британия ва Украина расмийлари томонидан тасдиқлангани хабарда қайд этилган.

Журналистларнинг аниқлашича, етказиб берилган хомашё божхонада нейлон ва полиэстер каби фуқаролик мақсадида ишлатиладиган синтетик материалларга тегишли код билан расмийлаштирилган.

Агар маҳсулот тўғри божхона коди билан расмийлаштирилганида, у ҳам фуқаролик саноатида, ҳам мудофаа соҳасида қўлланилиши мумкин бўлган икки хил мақсадли товар сифатида таснифланиши керак эди.

Хомашё 1,3 мингта дрон учун етарли бўлиши мумкин

Америкалик эксперт Дэвид Олбрайтнинг ҳисоб-китобига кўра, Jilin Chemical Fiber Group етказиб берган полиакрилонитрил хомашёси миқдори 1,3 мингта камикадзе-дрон учун зарур углерод толасини ишлаб чиқаришга етарли.

Украина хавфсизлик ва ҳамкорлик маркази эса 2022 йилдан буён Jilin Chemical Fiber Group компаниясидан «Алабуга-Волокно»га контейнерларда полиакрилонитрил хомашёси етказиб бериш бўйича камида саккизта тендерни кузатганини билдирган.