Сунъий интеллект ёрдамида яратилган тасвирларни ҳақиқий фотосурат деб қабул қилиш ҳолатлари кўпайган бир пайтда, австралиялик фотограф Мэтт Дикин билан бунинг акси содир бўлди. У олган ҳақиқий табиат суратини бир неча киши СИ генерацияси деб ўйлаган.
Дикиннинг мазкур иши якунда Australian Geographic Nature Photographer танловида бош мукофотни қўлга киритди. Фотосуратчининг айтишича, ноёб кадр олдиндан режалаштирилмаган ва деярли тасодифан олинган.
У ўша пайтда дрон ёрдамида сўниб бораётган қуёш нурлари саёз рифни қандай ёритаётганини тасвирга олаётган бўлган. Дронни яқинлаштирганида эса сувда денгиз тошбақалари гуруҳи томон сузиб келаётган яшил аррабурун балиқни кўриб қолган.
Фотосуратчи шу лаҳзани юқоридан тасвирга олишга муваффақ бўлган. У суратга Ethereal Encounter — тахминан «Ғайриоддий учрашув» деб ном берган.
Қизиғи, Дикин бу кадрни олишга улгурмай қолишига сал қолган. Суратга олиш пайтида дрон аккумулятори тугаб бораётган эди. Қурилма ерга қўндирилганида унинг қуввати атиги 3 фоиз қолган.
Суратдаги композиция ва денгиз жонзотларининг жойлашуви шу қадар ғайритабиий кўринганки, баъзи одамлар уни сунъий интеллект генератори ёрдамида тайёрланган деб ҳисоблаган.
Дикиннинг айтишича, бундай фикрлар уни хафа қилмаган. Аксинча, фотограф сурат ҳақиқатан ҳам нореалдек кўринишини тан олган.
Фотограф ушбу ишини танловнинг йўқолиб кетиш хавфи остидаги турларга бағишланган йўналишида тақдим этган. Суратда акс этган яшил аррабурун ҳам йўқолиб кетиш хавфи остидаги турлар қаторига киради.
Жанубий Австралия музейи ўтказадиган танловга тақдим этиладиган барча ишлар Австралия, Янги Зеландия, Антарктида ёки Янги Гвинея табиати билан боғлиқ бўлиши керак.
