Роналду бўш дарвозага гол уролмади, Исроилда аҳмоқона қизил
|11:115 54210 мин
Клопп ва Хави Германия ва Нидерландия миллий жамоалари бошқарувидаги дебютида ўзаро тўқнашди. Роналду фаолиятидаги 980-голни ура олмасдан майдонни тарк этди. Ҳоланд эса йўлидан чиққан рақибга гол уришда давом этмоқда: у миллий жамоадаги 56-ўйинида 63 ва 64-голларини уришга эришди.
Криштиану Роналду ўзи учун қадрдон бўлган «Жозе Алваладе» стадионида миллий жамоа билан хайрлашиши ҳақидаги хабарлар қуруқ гаплигича қолди. 41 ёшли футболчи шу куни Португалия либосида 234-ўйинини ўтказди ва бу охиргиси эмас.
Стадионга йиғилган мухлислар унинг тўпга ҳар тегинишини олқишлар билан қарши олишди, аммо у ўйин бошида яхши вазиятдан фойдалана олмади. Ўйиндаги ҳисобни эса унинг «Ан-Наср»даги жамоадоши Жоау Фелиш очди: яримҳимоячи 22-дақиқада жарима майдони ташқарисидан йўллаган зарбадан кейин тўп рақиб ҳимоячисига теккан ҳолда йўналишини ўзгартирди ва пастки бурчакка бориб тушди.
Криштиану Роналду иккинчи бўлим бошида фаолиятидаги 980-голини уришга жуда яқин келди, аммо деярли бўш дарвоза қаршисида турган ҳолда тўпни юқорига тепиб юборди.
У барибир Бруно Фернандешнинг пасидан кейин дарвозани ишғол этганида эса кичик офсайд ҳолати қайд этилди.
Шу куни португаллар сардори майдонни голсиз тарк этди – мураббий 67-дақиқада уни алмаштирди. Аммо португаллар усиз ҳам ғалабали ҳисобни сақлаб қолди ва титул ҳимоясини муваффақиятли бошлади.
Гуруҳдаги иккинчи ўйин эса скандинавлар дербисига айланди. Норвегия 18-дақиқага келиб икки тўп фарқи билан олдинга чиқиб олганди – Оскар Бобб ва Эрлинг Ҳоланд ўз номини таблога ёздириб қўйди. Аммо данияликлар ўйинга қайта олишди: Миккел Дамсгор тезда ҳисобни қисқартирди, иккинчи бўлимда эса Расмус Ҳойлунд мувозанатни тиклади.
Натижада Ҳоланд яна бир бор ўзини кўрсатишига тўғри келди – 74-дақиқада у Эдегор ёрдамида («Арсенал» сардори биринчи бўлимда Боббнинг ҳисобни очувчи голига ҳам ҳаммуаллифлик қилганди) ғалаба голини урди. Эрлинг миллий жамоа сафида фантастик натижа қайд этмоқда – у 56 ўйинда аллақачон 64 та гол уришга эришди. Бу билан у афсонавий немис ҳужумчиси Герд Мюллернинг натижасини такрорлади.
Норвегиялик киборгнинг ҳозирги спорт формаси ақл бовар қилмас даражада: клуб ва миллий жамоа сафидаги сўнгги олти ўйинида дарвозаларни 9 бор ишғол қилган ва бу оралиқда бирорта ўйинни голсиз тарк этмаган. Энди ҳафта охирида мухлислар Эрлинг ва Криштиану дуэтига гувоҳ бўлишади.
А лигаси, 2-гуруҳ
Хави Клоппга қарши
Нидерландия – Германия 1:1 Голлар: Нмеча, 32 (0:1). Гакпо, 90+2 (1:1) Нидерландия: Вербрюгген, ван Дейк, ван Ҳекке, ван де Вен, Дюмфрис, Гравенберҳ, Тимбер (Верман, 57), Рейндерс (Тил, 83), Гакпо, Саммервилл (ван Боммел, 83), Бробби (Меердинк, 35) Германия: тер Штеген, Та, Шлоттербек, Браун, Трой, Киммиҳ, Нмеча (Штаҳ, 64), Амири (Энгелҳардт, 80), Шаде (Фюрих, 64), Адейеми (Гнабри, 80), Ҳаверц (Эбнуталиб, 30) Огоҳлантиришлар: Тимбер, 22. ван Ҳекке, 24. Дюмфрис, 68 – Амири, 68
A2 гуруҳидаги икки фаворит – Юрген Клопп бошчилигидаги Германия ҳамда Хави ўз қўлига олган Нидерландия жамоалари биринчи турдаёқ тўқнашди. Бу икки мураббий учун миллий жамоалар бошқарувидаги илк ўйин эди ва унда мезбонлар ўйинга қўшиб берилган дақиқаларда мағлубиятдан қутулиб қолишди.
13-дақиқада мезбонлар дарвозани ишғол этганди, аммо Бробби томонидан дарвозабонга фол ишлатилган деб топилди ва ван Дейкнинг голи бекор қилинди.
30-дақиқада эса «Арсенал» ҳужумчиси Кай Ҳаверц ўз жамоадоши Юрриен Тимбернинг эгизак укаси Твентин томонидан ишлатилган фолдан кейин жароҳат олиб майдонни тарк этди.
32-дақиқада Феликс Нмеча Юрген Клопп жамоасини ҳисобда олдинга олиб чиқди ва бу устунлик ўйинга қўшиб берилган дақиқаларгача сақланиб қолди.
Сербия ўз майдонида кечган ўйинда Греция камбэк амалга оширишига имкон берди – 1:2. Ўйиннинг тўртинчи дақиқасидаёқ Андрий Живкович ҳисобни очганди. Йович бўлим ўрталарида учрашув тақдирини ҳал қилиб қўйиши мумкин эди, аммо у қулай вазиятда туриб тўпни тўсиндан юқорилатиб тепди.
Шундан кейин греклар мезбонлар дарвозасини қамал қилишга киришди ва фақат дарвозабоннинг маҳорати биринчи бўлимда ҳисоб тенглашишига йўл қўймади: Савич Золиснинг зарбасидан кейин тўсин остига кириб кетаётган тўпни тўхтатди. Иккинчи бўлимда «Арсенал» вингери барибир ўз мақсадига эришди ва ҳисобни тенглаштирди. Меҳмонлар ҳужум қилишда давом этишди ва уч баравар кўпроқ зарба беришди (22:8). Якунда эса ҳақли ғалаба голини уришди, захирадан ўйинга қўшилган «Комо» ҳужумчиси Анастасиос Дувикас 90+5-дақиқада грекларга уч очко олиб келди.
В лигаси, 3-гуруҳ
Австрия – Исроил 3:1 Голлар: Шмид, 43 – пеналти (1:0). Абу Фарҳи, 55 (1:1). Мвене, 90 (2:1). Калайжич, 90+3 (3:1) Австрия: А. Шлагер, Дансо, Линҳарт, Мвене, Пош, К. Шлагер, Зайвалд (Хорват, 73), Шмид (Чуквуэмека, 83), Грюлл (Ваннер, 46), Виммер (Ланг, 73), Грегорич (Калайжич, 37) Исроил: Д. Перец, Ревиво, Стоинов, Д. Перец (Шломо, 64), Наҳмиас, Мизраҳий (Леви, 64), Э. Перец, Глуҳ, Соломон (Тургеман, 73), Ҳалайлий, Абу Фарҳи Огоҳлантиришлар: К. Шлагер, 26. Дансо, 52. Виммер, 64 – Э. Перец, 31. Абу Фарҳи, 52 Четлатиш: Абу Фарҳи, 56 (иккинчи сариқ)
Бу қарама-қаршиликда австрияликлар фаворит эди, аммо ғалабага эришиш осон бўлмади.
Мезбонлар биринчи бўлим охирларида пеналтидан ҳисобни очишганди, 55-дақиқада эса Сайид Абу-Фарҳи ҳисобни тенглаштирди.
Аммо 20 ёшли ушбу форвард шу заҳоти аҳмоқона вазиятга тушиб қолди: у ўз голини бурчакдаги байроқчани кўтариб, нишонлади. Бош ҳакам Георгий Кабаков эса унга бу ҳаракати учун сариқ карточка кўрсатди. Бир неча дақиқа олдин Абу-Фарҳи рақибга бурчак зарбасини амалга оширишга тўсқинлик қилгани учун биринчи сариқ карточкани олганди ва иккинчи сариқдан кейин майдонни тарк этишга мажбур бўлди.
Маълум бўлишича, ҳакам футболчининг гол нишонлашдаги ҳаракатини «қуролдан ўқ узишга тақлид» деб баҳолаган. IFAB 12-қоидасида голни нишонлашда футболчи провокацион, масхараловчи ёки низоли тарзда ҳаракат қилса, сариқ карточка олиши кераклиги кўрсатилган.
Исроилликлар озчилик бўлиб қолганига қарамай, 90-дақиқагача дуранг ҳисобни ушлаб туришди. Аммо ўйинга қўшиб берилган дақиқаларда Филипп Мвене ва Саша Калайжич барибир рақибни таслим этишди.
Ирландия косоволиклар майдонида ўз ўйинини намойиш эта олмади ва мезбонлар зарбалар беришда мутлақ устунликка эришди – 23:3.
Ўйин тақдирини бу мавсум «Фенербаҳче»да порлаётган Мурики (охирги турда ушбу тажрибали ҳужумчи покерга эришди) урган гол ҳал қилди. Биринчи бўлим охирида унинг бош билан йўллаган зарбасидан кейин тўққизликка қараб кетаётган тўпни Келлеҳер қайтариб қолганди. Аммо ўйин охирларида дарвозабон барибир ушбу ҳужумчи қаршисида ожиз қолди. Мурикининг дастлабки зарбаси тўсиндан қайтди, унинг ўзи қайтган тўпни дарвозага киритиб юборди.
Литва ва Малта сафарда ғалаба қозонди
D1 ва D2 гуруҳларида Европа футболи аутсайдерлари ҳам ўз иштирокини бошлади.
● Малта Андоррадан иродали ғалаба билан қайтди – 2:1. Гилом Лопес 17-дақиқада андорраликларни олдинга бошлаганди, аммо мезбонлар шу куни ҳатто дурангга ҳам эриша олмади. Оролликлар биринчи бўлимдаёқ ҳисобни тенглаштиришди, 81-дақиқада эса Тедди Теума ғалаба голини урди.
● Литва ҳам сафарда ғалаба қозонди – Лихтенштейн устидан 2:0 ҳисобида. Ўйин тақдирини 53- ва 66-дақиқаларда урилган голлар ҳал қилди.
Жума куни биринчи тур учрашувлари давом этади. Марказий ўйинларда Зинедин Зидан бошқарувидаги Франция Туркия майдонига сафар қилади, Италия Белгияни қабул қилади.
