Ўзбекистон делегациясининг икки вакили – каноэчи Павел Эйгел ва спортнинг аралаш яккакураш турида иштирок этган Нодирбек Шавкатов допинг намуналарида тақиқланган моддалар аниқлангани туфайли 2026 йилги Осиё ўйинларидан вақтинча четлатилди.
Халқаро допинг-тест агентлиги (ITA) маълум қилишича, Павел Эйгелнинг намунасидан триметазидин, Нодирбек Шавкатовникидан эса мелдоний топилган. Ҳар иккала модда ҳам WADA тақиқлаган моддалар рўйхатига киритилган.
Якуний қарор чиққунга қадар спортчилар мусобақаларда қатнаша олмайди.
Улар натижани текшириш учун «B» намунасини таҳлил қилишни талаб қилиши ва вақтинчалик четлатиш қарори устидан Спорт арбитраж судига мурожаат қилиши мумкинлиги қайд этилган. Ҳозирча спортчиларга нисбатан якуний қарор чиқарилмаган.
Маълумот учун, Нодирбек Шавкатов (-71 кг) 21 сентябр куни аралаш жанг санъатининг модерн йўналишида бронза медал олганди, у яримфиналда Қозоғистон вакили Қодирбек Шинбаевга ютқазганди.
36 ёшли Павел Эйгел эса Россия фуқароси ҳисобланади ва 2018 йилги жаҳон чемпионатида бронза медал совриндори бўлган. 2025 йил майида у спорт фуқаролигини ўзгартириб, 2026 йилги Осиё ўйинларида Ўзбекистон номидан қатнашишга қарор қилганди. У турнирдаги иштирокини бугун, 29 сентябр куни бошлаши кутилаётганди, аммо дисквалификацияга учради. Шунингдек, 2 октябр куни ҳам яккалик (кросс) бўйича баҳсларда қатнашиши керак эди.
