18 октябрга ўтар кечаси Буюк Британия пойтахти Лондон шаҳрида ташкил этилган профессионал бокс оқшомида икки карра Олимпиада чемпиони, жаҳон чемпиони Баҳодир Жалолов британиялик Соломон Дакресга (10-1-0, 3 КО) қарши навбатдаги жангини ўтказди.

Ўзбекистонлик боксчи жангда тўлиқ устунлик қилди ва 5-раундда рақибини нокдаун ҳолатига ҳам туширди.

Қолган раундларда ҳам ташаббусга эгалик қилишда давом этди, тўлиқ 10 раунд давом этган жанг якунида ҳакамлар Жалоловнинг ғалабасини эътироф этишди (99-91, 99-90).

Шу тариқа, Big Uzbek’нинг ғалабали серияси давом этмоқда: 18 жангда 18 ғалаба, шундан 15 таси нокаут билан қўлга киритилган.

Жалолов сўнгги жангини 9 май куни Манчестерда ўтказганди. Ўшанда у хорватиялик Агрон Смакичини нокаутга учратган.