Причард Колон Флоридада туғилган, аммо болалигида оиласи билан Пуэрто-Рикога кўчиб ўтган. Бу ерда у тезда умидли боксчига айланади. 20 ёшигача у беш марта Пуэрто-Рико ҳаваскорлар чемпионатида ғолиб чиқади ва ёшлар ўртасида Панамерика ўйинлари олтин медалини қўлга киритади.

2013 йилда Колон профессионал боксга ўтади. У профессионал рингда 16 жангдан бирортасида ютқазмайди; 13 жангда нокаут билан ғалаба қозонади. Террел Уилямсга қарши ўн еттинчи жанг – Колон учун охиргиси бўлиб қолади.

Ушбу баҳс (унинг видеоси ютубда бор) ўта кескин кечади: рефери рақибнинг белдан пастки қисмига зарба учун Колондан очко олиб ташлайди, Уилямсга эса «rabbit punch» учун жарима берилади – боксда энсага зарба йўллаш шундай номланади; бундай зарбалар боксдан ташқари бошқа кўплаб яккакураш спорт турларида ҳам тақиқланган. Ҳакам рақибларнинг ҳар иккисини дисквалификация қилиш мумкинлиги ҳақида огоҳлантиради.

9-раундда Колон икки марта нокдаун ҳолатига тушади. Колоннинг жамоаси аъзолари эса бонг чалинганидан кейин хатолик туфайли 10-раунд ҳам якунланди, деб ўйлаб боксчининг қўлқопларини ечади. Шундан кейин рефери жангни муддатидан олдин тўхтатади.

Колон жангдан кейиноқ ўзини ёмон ҳис қилаётганини билдиради. Уни зудлик билан шифохонага олиб боришади, у ерда унга мияга қон қуйилиши ташхиси қўйилади. Шифокорлар боксчини сунъий кома ҳолатига туширишга мажбур бўлади ва у 221 кун давомида комада қолади. Шундан сўнг боксчи тўлақонли ҳаётга қайтмади: у ногиронлар аравачасида ҳаракатланар, ўзи мустақил овқатлана олмас ва гапира олмасди. 2026 йил 13 август куни Колоннинг оиласи унинг вафоти ҳақида хабар берди.

Террел Уилямс Колондан ҳам, унинг яқинларидан ҳам ошкора узр сўрамаган. Шу билан бирга, 2018 йилда у ҳар куни Колон учун ибодат қилишини айтган. Шунингдек, жангдан сўнг дарҳол рақибининг ҳолидан хабар олиш учун шифохонага бормоқчи бўлганини, бироқ уни бу фикридан қайтаришганини таъкидлаган.

Причард Колон оила аъзолари даврасида, 2017 йил май
Phelan M. Ebenhack / For The Washington Post / Getty Images

Жанг бўлиб ўтган Виржиния штати ҳукумати махсус текширув ўтказган. Лекин Уилямс, ҳакам ёки жангда ишлаган шифокорга нисбатан санкция қўллаш мумкин бўлган ҳеч қандай факт аниқланмаган.

Бутунжаҳон бокс кенгашининг (WDC) Колон хотирасига бағишланган пресс-релизида боксчи билан содир бўлган «бахтсиз ҳодиса» изсиз кетмагани таъкидланган: шундан кейин WDC хавфсизлик қоидаларини кучайтирган ва янада қатъий тиббий протоколларни жорий этган.

«Сенинг меросинг ва табассуминг қалбларимизда абадий қолади», – дейилади пресс-релизда.