Ла лига, 9-тур
«Бетис» – «Барселона» 2:5
Голлар: Ямал, 10 (0:1). Гомес, 27 (1:1). Родри, 41 (1:2). Габриэл Жезус, 51 (1:3). Аззалзулий, 53 (2:3). Э. Гарсия, 62 (2:4). Олмо, 81 (2:5)
«Бетис»: Валес, Лиоренте, Гомес, Ф. Гарсия, Беллерин (Ортис, 70), Бернал, Себалиос (Деосса, 46), Пабло Форналс (Фидалго, 70), Аззалзулий, Ло Селсо (Рикелме, 64), Эрнандес (Пэрротт, 64)
«Барселона»: Х. Гарсия, Кубарси, Мартин (Э. Гарсия, 46), Эспарт, Кунде, Педри, Родри, Фермин Лопес (Олмо, 62), Адейеми (Гордон, 62), Ямал (Рафиня, 70), Габриэл Жезус (Гави, 80)
Огоҳлантиришлар: Беллерин, 22. Лиоренте, 61 – Фермин Лопес, 20. Ямал, 55
Четлатиш: Бернал, 54
Тўққиз турда тўққиз ғалаба: «Барселона» Испания чемпионатини рекорд серия билан бошлаш бўйича «Реал» томонидан 1968/1969 йиллар мавсумида ўрнатилган рекордни такрорлади. Аммо Севиляда кечган ўйин кўк-анорранглилар учун осон кечмади.
«Барселона» тўрт кун олдин Чемпионлар лигасида ўйнаганди, кейинги ҳафта эса Ҳанс-Дитер Флик шогирдларини ЕЧЛда «ПСЖ», Ла лигада «Реал»га қарши жанглар кутмоқда. Шунга қарамай, бош мураббий Истанбулда ўйнаган таркиб билан солиштирганда катта ротацияга қўл урмади.
Ўйин дебютида «Барселона» тўпни назорат қилди, «Бетис» эса 4-4-2 схемасида ўрта блокда ҳимояланди, ҳужумдаги Форналс ва Эрнандес ҳимоянинг биринчи чизиғини ташкил этишди. Каталонияликлар 10 дақиқа давомида рақиб ҳимоясига калит қидиришди, кейин эса илк зарбаниёқ голга айлантиришди. Ямал бир ҳимоячини икки бор алдаб, тўпни жарима майдонига кирмасдан олис бурчакка йўналтирди.
Биринчи бўлим ўрталаридан ўтганда мезбонлар стандарт вазиятдан жавоб қайтаришди. Бурчак зарбасидан кейин ҳимоячилар тўпни узоқлаштира олишмади ва унга эга чиққан Форналс Гомесни голли пас билан таъминлади.
Ҳисоб тенглашгач, ўйин очилди – бўлим охирига қадар икки жамоада ҳам навбати билан голли вазиятлар юзага келди. Танаффус арафасида Флик жамоаси ҳам бурчак зарбасидан гол урди. Фермин тўпни жарима майдони марказига етказди, Родри эса бош билан дарвозани ишғол этиб, каталонияликлар сафидаги илк голини нишонлади.
Кўп ўтмай Ло Челсо ҳам Ямалдан кам бўлмаган шедевр зарба ижро этди, аммо VAR вазиятга аралашиб, Кучо Эрнандес тўпни қўл билан ўйнагани учун бу голни бекор қилди. Лекин тўп қўлга теккан вазият ҳужумнинг олдинги фазасида рўй берган, гол эса ҳужум қайтадан бошланганда урилганди.
