Мартинесда қўрқинчли жароҳат, Ҳоландда дубл. Кун ўйинлари
|13:143 85212 мин
«Челси» сафарда муҳим ғалабага эришди, аммо жиддий йўқотишга учради; «Ливерпул» рақиби икки қизил олган ўйинда камбэкка эришди; «Сити» мавсум стартида қаторасига 7 ўйиндан иборат ғалабали серия қайд этмоқда, Ҳусанов иккинчи бўлимда жароҳат олган футболчи ўрнига туширилди. Шанба куни Европа чемпионатларида рўй берган асосий воқеалар, ўйинлардаги голлар ва турнир жадвалларидаги вазият.
6 турдан кейин бешинчи ўринга чиқиб олган ва мавсумни мағлубиятсиз ўтказаётган «Эвертон» дастлабки 45 дақиқаликда турнир жадвалида ўзидан қуйида жойлашган «Челси»ни ўзига мос бўлган, яккакурашларга таянган футбол ўйнашга мажбур қила олди. Ўйинда тез-тез тўқнашувлар ва тўхталишлар юзага келди, фақат бўлим охирларида Пикфордга иш топилди. Дастлаб Кайседонинг зарбасидан кейин тўп дарвоза тўсинига борди, бироз ўтиб Англия миллий жамоаси дарвозабони Педру Нетунинг зарбасидан кейин тўсин остидан кириб кетаётган тўпни қайтариб қолди.
Иккинчи бўлим эса Ҳаби Алонсо жамоасининг тезкор голи билан бошланди. Кучли босим уюштирган лондонликлар тўпни олиб қўйиб, тезкор қарши ҳужумда ўз мақсадига эришди. Роджерс чап қанотдан олдинга ташланган ҳимоячи Ҳатони тўп билан таъминлади, у эса жарима майдонига кириб бориб, марказда бўш турган Нетуга голли пас берди. Кўп ўтмай португалиялик вингер яна бир қулай вазиятдан фойдалана олмади.
Ўйиннинг 65-дақиқасида эса хавотирли эпизод рўй берди. «Эвертон» лондонликлар дарвозаси томон жарима зарбаси ижро этиш ҳуқуқига эга бўлди: Кирнан Дюсбери-Ҳолл тўпни дарвозабон майдончаси ҳудудига оширди, у ерда эса меҳмонлар дарвозабони Эмилиано Мартинес ва мезбонлар ҳимоячиси Жарред Брантуэйт тўқнашиб кетди. Икки футболчи бош билан тўқнашгач, газонга қулади.
«Эвертон» футболчиси дарҳол ўрнидан турди, аргентиналик дарвозабоннинг жароҳати эса жиддийроқ бўлиб чиқди ва унга 10 дақиқа давомида тиббий ёрдам кўрсатилди. Бу вақт давомида ўйин тўхтатиб турилди, якунда футболчи замбилда майдондан олиб чиқилди ва шифохонага олиб кетилди. У энди икки ойгача жамоасига ёрдам бера олмаслиги айтилмоқда.
Мавзуга оид
«Челси» ўйинни 21 ёшли дарвозабон Майк Пендерс билан давом эттирди, у қолган вақт мобайнида дарвоза дахлсизлигини сақлаб қолди, Нету эса дублни расмийлаштирди. Эътиборли жиҳати, Бу «Челси»нинг 17 январдан буён илк бор қуруқ ўйин ўтказиши бўлди, жамоа бунгача АПЛда қаторасига 22 ўйинда дарвозаси дахлсизлигини сақлай олмаётганди. Муҳими бу ғалабадан кейин «Челси» кучли тўртликка кириб олди.
«Ливерпул» кадрлар муаммосидан қийналишда давом этмоқда. Халқаро танаффусда жароҳат олган Исак ва Гакпо сафга қайтган, аммо иккинчиси ҳали майдонга тушишга тайёр эмас. Собослаи ҳам шанба кунги ўйинда туширилди, аммо биринчи бўлимда яна жароҳат олди Экитике, Брэдли ва Гравенберҳнинг ёнига бориб қўшилди. Унинг ўрнига туширилган 19 ёшли Нионига эса тажриба етишмаслиги кўриниб қолди.
Қолаверса, қизиллар жамоасида ҳужумларни якунлашда аниқлик етишмаяпти. Ҳафта ўртасида ЕЧЛ ўйинида ҳет-трик қайд этган Барколя рақиб хатосидан кейин тўпни эгаллаб, дарвозабон билан яккама-якка вазиятга чиқиб борганди, аммо тўпга аниқ зарба бера олмади. «Брентфорд» эса ўз имкониятини қўлдан чиқармади ва бўлим охирида Люис-Поттер Игор Тиагонинг узатмасини голга айлантирди.
Аммо «асаларилар» танаффусга яхши кайфиятда чиқиб кета олишмади. Биринчи бўлимга қўшиб берилган дақиқалар тугаётганида Ярмолюк рақиб ҳимоячиси Жакенинг юзига бош билан зарба бериб юборгани маълум бўлди ва видеотакрордан кейин тажовузкор ҳаракат учун қизил карточка кўрсатилди. Амалда бу эпизод ўйин тақдирини ҳал қилди.
Танаффусда Андони Ираола навбатдаги жароҳат туфайли Арауҳони ҳам алмаштиришга мажбур бўлди, лекин унинг шогирдлари иккинчи бўлимда ғалабани ўз томонига оғдира олишди. Аввалига Муниос ҳисобни тенглаштирди, кейин Исак ғалаба голини урди.
Докунинг Фоденга узатмаси билан ҳисобни очган «Манчестер Сити» икки дақиқа ўтмай ўз дарвозасидан гол ўтказиб юборди. Гейи «Ипсвич»ҳужумчиси Маэдани ўтказиб юборди, япониялик футболчи эса дарвозабонга ҳеч қандай имкон қолдирмади. Лекин турнир жадвали пешқадамлари биринчи бўлимнинг ўзида яна ҳисобда олдинга чиқиб олишди – Ковачич ўнг қанотда фаол ҳаракат қилиб, тўпни Ҳоланднинг бошига етказиб берди.
Иккинчи бўлимда эса Эрлинг юбилей голни уриб, амалда ўйин тақдирини ҳал қилди: у АПЛда пеналтисиз урган голлари сонини 100 тага етказди ва бу натижа учун энг кам ўйин сарфлаган (139) футболчига айланди. Норвегиялик ҳужумчи ўйинни ҳет-трик билан якунлаши мумкин эди, аммо бу сафар VAR вазиятга аралашиб, унга пас берган Энцо Фернандеш офсайдда бўлганини қайд этди. Ўйин охирида эса мезбонлар учун хавотирли вазият юзага келди ва видеотакрордан кейин Гейи жарима майдони ичкарисида Фатавуга нисбатан фол ишлатгани маълум бўлди. Белгиланган пеналтини эса Флемминг аниқ ижро этиб, ҳисобни қисқартирди.
Ҳакам ўйинга нақ 12 дақиқа қўшиб берди, аммо қолган вақт мобайнида Абдуқодир Ҳусанов (у иккинчи бўлим давомида жароҳат олган Нунеш ўрнига ўнг қанот ҳимоясига туширилди) ва ҳимоя чизиғи бошқа гол ўтказмади. Ҳоланднинг голлари якунда Энцо Маресканинг рекордини таъминлади: италиялик мутахассис АПЛда тайинловдан кейинги дастлабки етти ўйинида ғалаба қозонган илк мураббийга айланди.
Испания: Баэна ажойиб формада
«Эспанёл» – «Атлетико» 0:1 Гол: Баэна, 89 (0:1) «Эспанёл»: Фортунио, Ридел, Кабрера, Дркушич (Нунес, 64), Инохо, Ал Ҳилолий, Экспосито (Габриэл Маскардо, 73), Пол Лосано, Сарагоса (Пуадо, 82), Эрнандес (Калатрава, 73), Р. Фернандес (М. Фернандес, 82) «Атлетико»: Облак, Ганцко, Ромеро (Мендоса, 67), Мартинес (Грималдо, 46), Пубил, Барриос (Лиоренте, 55), Юлманд, Лукман (Алварес, 46), Симеоне, Ли Кан Ин (Баэна, 62), Дэвид Огоҳлантиришлар: Иноҳо, 81. Нунес, 87 – Юлманд, 22. Ли Кан Ин, 43. Ромеро, 66. Баэна, 68. Мендоса, 79
«Атлетико» «Эспанёл»ни сўнгги дақиқаларда таслим этиб, тур якунига кўра иккинчи ўринда қоладиган бўлди. Иккинчи бўлимда захирадан туширилган Алварес дриблинг ишлатиб чап қанотдан марказга кўчди ва жарима майдонига яқинлашиб келган Алекс Баэнани тўп билан таъминлади. Испания миллий жамоаси яримҳимоячиси мавсум стартида мадридликлар жамоасининг энг сермаҳсул футболчиси бўлмоқда: у аллақачон бутун ўтган мавсумдаги голли ҳаракатларидан кўпроқ гол ва пас беришга улгарди (5+2). Баэнанинг Диего Симеоне талабларига мослашиш даври ортда қолгани тайин. Алекс яна иккита аниқ зарба бериш орқали «Вилярреал»да ўйнаган давридаги ўз голли рекордини такрорлаши мумкин.
Италиянинг ЕЧЛда муваффақиятсиз қатнашаётган яна бир вакили «Интер» учу ҳам «Болоня»га қарши ўйин ёмон бошланганди. Мезбонлар яримҳимоячиси Побега 10-дақиқада марказдан ёриб кириб, ҳисобни очди. Аммо амалдаги чемпионлар танаффус арафасида Тюрамнинг голи билан мувозанатни тиклади.
Иккинчи бўлимда эса миланликлар вазиятни ўз томонига оғдиришди. Аввалига Зелински Карлос Аугустуни қулай вазиятга чиқарди, кейин эса бразилиялик футболчининг ўзи шундай ҳолатда Боннига ассистентлик қилди. «Интера» етти турдан кейин 19 очко жамғарган ҳолда турнир жадвалида пешқадамлик қилишда давом этмоқда.
«Рома» ҳам ҳафта ўртасида «Реал» билан ўйинда оғир руҳий зарбага учраганди. Қолаверса, таркибда жиддий йўқотишлар юзага келган (дарвозабон Свилар ва жамоа етакчиси Дибалада жароҳат, асосий ҳужумчи Моленда дисквалификация). Натижада римлик мухлисларнинг севимлиси ҳисобланган Даниэле Де Росси бошқарувидаги «Женоа»га қарши ўйиннинг биринчи бўлимида ҳисоб очилмай қолди. Аммо иккинчи бўлимда Кастро «бўрилар» сафида урган илк гол ўйинни ўзгартириб юборди.
Аргентиналик футболчи бурчак зарбаси вақтида рақиб футболчилари қуршовида турган ҳолатда шедевр зарба ижро этди ва тўпни дарвозабон устидан ошириб ташлади. Иккинчи бўлим давомида 19 ёшли ҳимоячи Лулли ўйин тақдирини ҳал қилувчи голни урди. Деярли иккинчи таркиби билан ўйнаган «Рома» ғалаба қозонди ва «Интер» билан икки очколик фарқни сақлаб қолди. «Лацио» бугун «Ювентус»ни мағлуб эта олмаса, «бўрилар» турнир жадвалидаги иккинчи ўринни ҳам сақлаб қолади.
