Германиянинг Mercedes-AMG компанияси янги GT электр кроссоверини намойиш қилди. Автомобилнинг олд қисми ёритгичли анъанавий AMG радиатор панжарасини эслатувчи вертикал металл чизиқли декоратив панел билан безатилган. Олд фаралар уч нурли юлдуз шаклидаги кундузги чироқларга эга бўлди, орқа томонга эса горизонтал диодли чизиқ билан уйғунлашган олтита думалоқ ёруғлик элементи ўрнатилган.
Шунингдек, автомобилнинг ўзига хос жиҳатлари қаторидан ромсиз ён ойналар, кенгайтирилган ғилдирак аркалари ва яширин эшик тутқичлари жой олган.
Янги моделнинг узунлиги 5080 мм дан 5084 мм гача, кенглиги 2001 мм, баландлиги 1653 ёки 1656 мм, ғилдирак базаси эса 3040 мм ни ташкил этади.
Аэродинамикага алоҳида эътибор қаратилган. AMG GT 55 ва GT 63 версияларининг том қисмида фаол спойлер кўзда тутилган бўлиб, тезлик 150 км/соатга етганда у ўз ҳолатини ўзгартира бошлайди. Тезлик ва ҳаракатланиш шароитларига қараб, у ҳаво қаршилигини камайтириши ёки босим кучини ошириши мумкин.
Бундан ташқари, олд бамперга бошқарилувчи вертикал жалюзилар ўрнатилган. Одатий шароитларда улар ёпиқ туради, аммо зарурат туғилганда қўшимча совитиш учун очилади.
Mercedes-AMG GT 53 бошланғич версияси ҳар бир ўқда биттадан — жами иккита синхрон электр двигател билан жиҳозланган. Уларнинг умумий қуввати 544 от кучини ташкил этади.
Қувватлироқ GT 55 ва GT 63 моделлари эса ўқ бўйлаб йўналган магнит оқимли учта электр двигателга эга бўлди. Улардан иккитаси орқа ўққа, яна биттаси олд ўққа ўрнатилган. Mercedes-AMG GT 55 816 от кучини ишлаб чиқарса, флагман GT 63 нинг максимал қуввати 1169 от кучига етади.
Энг қудратли кроссовер жойидан 100 км/соат тезликка 2,5 сонияда эришади, 200 км/соатлик маррани эса 6,8 сонияда забт этади.
