Jeep компанияси Лас-Вегасдаги SEMA-2026 кўргазмасида Jeep Wrangler Scrambler SRT пикапининг махсус версиясини намойиш қилди. Автомобил замонавий Jeep Wrangler базасида яратилган бўлса-да, шубҳасиз, 1981 йилдан 1986 йилгача ишлаб чиқарилган классик Jeep CJ-8 Scrambler моделидан илҳомланган.
Махсус жигаррангга бўялган Scrambler кузови жиддий қайта ишланган: унда узунроқ эшиклар, бортли ўзгача орқа қисм ва махсус ҳимоя қопламаси сепилган юк майдони пайдо бўлган.
Кучайтирилган хавфсизлик каркаси ва ўзига хос ғилдирак аркалари кенгайтиргичлари ўрнатилган. Томи ва эшиклари эса ечиб олинадиган қилиб ишланган.
Scrambler’нинг олд қисми Easter Jeep Safari махсус версияси услубида ишланган бўлиб, квадрат қоплама ичига жойлаштирилган думалоқ фараларни ўз ичига олади. Бундай ечим «хўмрайган нигоҳ»ни шакллантириб, йўлтанламаснинг шусиз ҳам мардона қиёфасига янада кўпроқ салобат ва виқор бағишлайди.
Салонда ён таянчлари ривожланган ўриндиқлар ўрнатилган, орқа қаторни эса жиҳоз ва анжомларга жой бўшатиш учун 180 даражага буриш ёки бутунлай ечиб олиш мумкин.
Салонни безашда «тўқ графит» тусидаги чармдан фойдаланилган. Шунингдек, контраст чоклар, тўқ сариқ рангли безак қўшимчалари ва SRT логотиплари ҳам мавжуд.
Машинанинг асосий техник хусусияти олд кўприкдан воз кечилиб, мустақил осма тизимига ўтилгани бўлди. Ушбу ноёб конструкция америкалик автопойгачи Кейси Карри иштирокида ишлаб чиқилган.
