Ҳафта давомида кутилаётган об-ҳаво билан иқлимшунос Эркин Абдулаҳатов таништиради.
Қишлоқ хўжалигига таъсир. Ҳафта давомида ёғингарчиликнинг кутилмаётгани тупроқ намлигининг тикланишини чеклайди. Суғориладиган майдонларда сувдан оқилона фойдаланиш, кузги экинларнинг ҳолатини кузатиш ва тупроқ намлигини ҳисобга олган ҳолда суғориш ишларини режалаштириш муҳим. Шимолий ҳудудлар, Устюрт ва Қизилқум атрофида тунги ҳарорат нол даражагача пасайиши мумкинлиги сабабли совуққа сезгир сабзавотлар ҳамда кечки экинларнинг ҳолатига алоҳида эътибор қаратиш лозим. Бироқ совуқ уриши хавфи муайян экин тури, унинг ривожланиш босқичи ва майдондаги ҳақиқий ҳароратга боғлиқ.
Аҳоли саломатлигига таъсир. Тунги ва кундузги ҳарорат ўртасидаги катта фарқ, айниқса болалар, кексалар, астма ва юрак-қон томир касалликлари бўлган кишилар учун ноқулайлик туғдириши мумкин. Эрталаб ва кечқурун иссиқроқ кийиниш, кундузги ҳароратга қараб кийимни мослаштириш ва очиқ ҳавода узоқ қолганда совқотишдан сақланиш тавсия этилади.
Антициклон таъсирида шамол сусайиб, атмосфера турғунлашса, Тошкент ва водийнинг айрим ҳудудларида ҳавони ифлослантирувчи заррачалар тўпланиши мумкин. Бу ҳолат нафас йўллари касалликлари бор кишиларда симптомларни кучайтириши эҳтимолини оширади. Шунинг учун ҳаво сифати кўрсаткичларини кузатиш, PM2.5 юқори бўлган пайтларда очиқ ҳаводаги жадал жисмоний фаолликни чеклаш мақсадга мувофиқдир.
