DW хабарига кўра, воқеа 18 октябр кечқурун содир бўлган. Авиакомпания Австриянинг APA ахборот агентлигига таҳдид ҳақида хабар келиб тушганини ва Болгария пойтахтида самолёт текширилаётганини тасдиқлаган.
Flightradar24 маълумотларига кўра, лайнер дастлаб одатий йўналиш бўйича ҳаракатланган. Бироқ Руминия жануби осмонида кескин бурилиб, Софияга йўналган.
Sky News телеканалига Болгария расмийлари самолёт қўнишидан олдин уни миллий ҳарбий-ҳаво кучлари қирувчиси кузатиб борганини билдирган. Аэропортда барча йўловчилар бортдан туширилган ва самолёт кўздан кечирилган.
Тахминан уч соатдан кейин лайнер Софиядан яна ҳавога кўтарилган. У Венага 19 октябрга ўтар кечаси етиб борган.
Хабарда таҳдид ким томонидан ва қандай усулда юборилгани, шунингдек, текширувнинг батафсил натижалари очиқланмаган.
