Reuters агентлигига таяниб DW хабар беришича, самолётларнинг барчаси Европа шаҳарлари ўртасидаги рейсларни бажараётган бўлган. Уларнинг тўрттаси Ирландиянинг Ryanair авиакомпаниясига тегишли.
Самолётларнинг иккитаси Варшавага, яна иккитаси Софияга, иккитаси Римга ва биттаси Испаниянинг Мурсия шаҳрига парвоз қилаётган бўлган.
Польшанинг LOT авиакомпаниясига тегишли, Лондондан Варшавага учган самолёт Шопен номидаги асосий аэропорт ўрнига шаҳар яқинидаги Варшава-Модлин аэропортига йўналтирилган. Лайнер қўнгач, уни текшириш давомида аэропорт вақтинча ёпилган.
Копенгагендан Варшавага келган Scandinavian Airlines (SAS) самолёти эса Шопен аэропортига қўнган. Борт текширилганида ҳеч қандай хавфли буюм топилмаган.
Софияга парвоз қилаётган яна икки самолёт бўйича ҳам бомба ҳақида хабар олинган. Улардан бири Дублиндан учган Ryanair, иккинчиси эса Милан-Бергамо аэропортидан йўлга чиққан Венгриянинг Wizz Air авиакомпанияси самолёти бўлган.
Шунингдек, Ryanair авиакомпаниясининг Мурсияга қўнган битта ва Римга Лиссабон ҳамда Дублиндан келган иккита самолёти ҳам таҳдидлар сабаб текширувдан ўтказилган.
Бундан бир кун аввал, 2 ноябр куни ҳам шунга ўхшаш ҳодиса юз берган. Лондондан Софияга учган Wizz Air самолёти бортида бомба борлиги ҳақидаги хабардан сўнг Будапешт аэропортига фавқулодда қўнган. Уни Венгрия қирувчи самолёти кузатиб борган. Текширувда портловчи модда излари топилмаган.
Авиация соҳасидаги хавфларни таҳлил қилувчи Osprey Flight Solutions консалтинг компанияси таҳлилий бўлими раҳбари Рис Жонснинг фикрича, бундай хабарлардан мақсад умуман авиақатновларни издан чиқариш бўлган.
«Аниқ нишон — муайян давлат, авиакомпания ёки йўналиш йўқлиги мақсад умуман авиақатновларни издан чиқариш бўлганидан далолат беради», — деган у Reuters агентлигига.
Ёлғон хабарлар ортида ким тургани ҳозирча маълум эмас.
