19 октябрь куни Кимнинг комага тушгани ҳақида Британиянинг The Sun, Американинг New York Post таблоидлари ва Ҳиндистоннинг Economic Times нашри ёзди. Улар «ижтимоий тармоқ фойдаланувчилари»га таяниб, КХДР етакчиси миясига қон қуйилиши оқибатида комага тушиб қолгани ва Пекиндаги шифохоналардан бирига ётқизилганини таъкидлаган.
КХДР бу хабарларга изоҳ бермади, бироқ 20 октябрь куни Корея марказий телеграф агентлиги Ким ўз оиласи билан Пхеньяндаги кийим-кечак ва пойабзал кўргазмасига ташриф буюргани ҳақида репортаж эълон қилди. Таъкидланишича, бу воқеа бир кун аввал юз берган.
Жанубий Кореянинг “Yonhap” агентлигининг қайд этишича, АҚШда яшовчи таниқли хитойлик диссидент Ванжун Се томонидан Х ижтимоий тармоғида қолдирилган хабар миш-мишларнинг бирламчи манбаси бўлган. Се дастлабки постда Кимнинг Хитойда шифохонага ётқизилганига қарамай вафот этганини иддао қилган.
Жанубий кореялик дипломатлар ва разведкадаги манбалар Ким Чен Иннинг комага тушгани ҳақидаги даъволарни тасдиқловчи “ҳеч қандай маълумот эшитмаганликлари”ни маълум қилди.
Сентябрь ойида Жанубий Корея разведкаси парламентга ҳисобот тақдим этиб, унда Ким ўта оғир даражадаги семизликдан азият чекаётганини таъкидлаган эди: бўйи 170 сантиметр бўлгани ҳолда, у 140 килограмм тош босяпти. Шу билан бирга, разведка ҳисоб-китобларига кўра, “даволовчи шифокорлар гуруҳининг синчков кузатуви инобатга олинса”, КХДР етакчисининг соғлиғида жиддий муаммолар борлигидан дарак берувчи аломатлар йўқ.
КХДР расмийлари Кимнинг соғлиғи ҳақида ҳеч қачон хабар бермаган.
