Янги космопланга Spaceship Apeiron номи берилди. Қадимги юнон тилидан олинган Apeiron сўзи «чексиз» ёки «чегарасиз» деган маънони англатади. Ном оммавий овоз бериш орқали танланган. Унда 83 мамлакатдан минглаб одамлар иштирок этган.
Дастлаб Virgin Galactic ходимлари космоплан учун 276 та ном таклиф қилган. Компания улар орасидан тўрттасини якуний босқичга саралаб олган. Овоз беришда Apeiron варианти Horizon — «Уфқ», Explorer — «Тадқиқотчи» ва Ascend — «Юксалиш» номларини ортда қолдирган.
Тақдимот 28 октябр куни компаниянинг Аризона штатидаги Меса шаҳрида жойлашган ишлаб чиқариш корхонасида ўтказилди. Шу куни космоплан VMS Eve ташувчи самолётига бириктирилган ҳолда Ню-Мексико штатидаги «Америка» космодромига етказилди. Бу ер аппаратнинг доимий базасига айланади.
Энди муҳандислар борт электроникаси дастурий таъминотини созлаш ва текшириш ишларини якунлаб, космопланни парвоз синовларига тайёрлайди. Синовлар муваффақиятли тугагач, тижорий парвозларга ўтиш режалаштирилган. Компаниянинг янгиланган маълумотига кўра, Apeiron билан дастлабки йўловчи парвозлари 2027 йилнинг иккинчи чораги бошида амалга оширилиши кутилмоқда.
Delta туркуми Virgin Galactic’нинг аввалги VSS Unity космоплани ўрнини эгаллайди. VSS Unity 2023 йил ёзидан 2024 йил ёзигача еттита суборбитал парвозни амалга оширган. Шундан сўнг компания маблағ ва ресурсларини янги авлод аппаратларини яратишга йўналтириш учун унинг парвозларини тўхтатган эди.
Virgin Galactic янги космопланлардан анча тез-тез фойдаланишни режалаштирмоқда. Мунтазам эксплуатация йўлга қўйилгач, ҳар бир Delta аппарати ойига саккиз мартагача парвоз қилиши кўзда тутилган.
Айни пайтда ушбу туркумдаги иккинчи космоплан ҳам қурилмоқда. Компания унинг тижорий парвозларини 2027 йил иккинчи чораги охири ёки учинчи чораги бошида бошлашни режалаштирган.
Янги аппаратларнинг ишга тушишини юзлаб бўлажак космик сайёҳлар кутмоқда. Virgin Galactic’нинг АҚШ Қимматли қоғозлар ва биржалар комиссиясига тақдим этган 2026 йил иккинчи чорагига оид ҳисоботига кўра, аввал чипта сотиб олган қарийб 675 киши ҳали ҳам суборбитал парвоз учун навбатда турибди.
Уларнинг 100 нафардан зиёди дастлабки тайёргарлик босқичига киришмоқда. Иккинчи Delta космоплани фойдаланишга топширилгач, бошқа чипта эгалари ҳам тайёргарлик жараёнига жалб этилиши кутилмоқда.
