Американинг United Airlines авиакомпанияси ўзининг халқаро йўналишлар тармоғини кенгайтириш мақсадида Қозоғистон ва Ўзбекистонни истиқболли манзиллар сифатида кўриб чиқмоқда. Бу ҳақда компания бош директори Скотт Кирби Cheeky Pint подкастида маълум қилди.
Суҳбат давомида Кирбидан авиакомпания янги йўналишларни қандай танлаши ҳақида сўрашди. Унинг сўзларига кўра, бу иш билан Патрик Куэйл бошчилигидаги махсус жамоа шуғулланади. Жамоа ноодатий маршрутларни ўрганади ва ҳар доим ҳам статистика орқали аниқлаб бўлмайдиган истиқболли йўналишларни излайди.
United Airlines раҳбарининг сўзларига кўра, жорий йилда Патрик Куэйл янги бозорларнинг истиқболларини баҳолаш мақсадида Қозоғистон ва Ўзбекистонда ҳам бўлган.
«Ҳозирча Россия ҳаво ҳудудидан фойдаланиш имкониятига эга бўлмаганимиз сабабли у ерга уча олмаймиз. Бироқ у [Куэйл] аллақачон ушбу бозорларни ўрганмоқда ва улар келажакда биз учун қандай имкониятлар очиши мумкинлиги устида бош қотирмоқда. У айнан шундай лойиҳалар билан шуғулланади ва унинг ажойиб жамоаси бор», — деди Кирби.
United Airlines — АҚШ ва дунёдаги энг йирик авиакомпаниялардан бири. Бугунги кунда авиаташувчи Delta Air Lines ва American Airlines билан бир қаторда Америка авиакомпанияларининг «катта учлиги» деб аталувчи рўйхатга киради.
Авиаташувчи паркида мингдан ортиқ самолёт бор. Авиакомпания ҳар куни 4500 га яқин рейсни амалга оширади. Унинг йўналишлар тармоғи Шимолий Америка, Европа, Жанубий Америка ва Осиёнинг 75 га яқин мамлакатидаги 350 дан ортиқ манзилни қамраб олади.
