Лас-Вегасдаги SEMA тюнинг ва автомобил ускуналари кўргазмасида Ford Bronco‘нинг мураккаб эксплуатация шароитларига мўлжалланган “зарядланган” версияси намойиш этилди.
SEMA — бу Махсус автомобил ускуналари ишлаб чиқарувчилар уюшмаси (SEMA) томонидан 1967 йилдан бери ҳар йили ўтказиладиган автомобил тюнинги ва махсус ускуналар кўргазмаси. У жаҳон тюнинг саноатидаги энг асосий тадбирлардан бири ҳисобланади. Янги деталлар, технологиялар ва тайёр лойиҳаларни намойиш этишдан ташқари, дастурдан ўқув семинарлари ҳамда махсус тадбирлар, масалан, дрифт-шоулар ўрин олган.
Базавий Bronco‘дан ташқи фарқлари оддий кўз билан ҳам яққол кўринади: кўтарилган подвеска, диаметри 18 дюймли бедлокли Weld ғилдирак дисклари, ташқи диаметри 42 дюйм бўлган BFGoodrich йўлтанламас шиналари, томдаги экспедиция юкхонаси ҳамда ташқарига чиқарилган ёнилғи баки.
Жанговар қиёфа Bronco Frostwarden’ning техник жиҳозланишига тўлиқ мос келади: капот остига Ford Super Duty туркуми учун мўлжалланган 7,3 литр ҳажмли Megazilla 2.0 бензинли двигатели ўрнатилган.
Куч агрегати бир қатор ўзгаришларга учради: блок, поршенлар ва тақсимлаш вали кучайтирилди, янада унумдор форсункалар ҳамда бошқача тасмали узатма ва демпфер ўрнатилди. Шунингдек, 3 литр ҳажмли Whipple механик компрессори ҳам кўзда тутилган.
Модернизация қилинган двигател 1,2 мингдан ортиқ от кучи ва 1355 Нм айланиш лаҳзасини беради.
Куч агрегати билан жуфтликда Ford’нинг оғир пикапларида қўлланиладиган TorqShift сериясига мансуб 10 поғонали автоматик узатмалар қутиси ишлайди.
Подвескада махсус тайёрланган Bilstein амортизаторларидан фойдаланилган. Ford Bronco Frostwarden бориш қийин бўлган ҳудудларда, масалан, Арктикада ўтказиладиган қутқарув операцияларида қўлланилиши тахмин қилинмоқда.
