Айбловга кўра, Маккензи ва яна 28 киши секта аъзоларига фарзандлари «Исо билан учрашиши» учун уларни очликдан ўлгунча қийнашни буюрган. Бу дунёдаги бузғунчи секталар фаолиятининг энг ҳалокатли оқибатларидан бири бўлди, деб ёзди BBC.
Судья Диана Мочаче ҳукмни эълон қилар экан, Маккензи «асосий жиноий жавобгарликни» ўз зиммасига олишини маълум қилди.
«Ушбу ҳукм ўринли ва адолатлидир; у бундай ёвузликлар қонунда белгиланган энг оғир жазо чоралари билан жазоланиши ҳақида қатъий огоҳлантириш бўлиб хизмат қилади», — деб қўшимча қилди судья.
Ўзини диний роҳиб - пастор деб эълон қилган Маккензи 2023 йилда Кения соҳили яқинидаги Шакахола ўрмонида кўмилган 400 дан ортиқ жасад топилгач ҳибсга олинган эди. Суд-тиббий экспертиза натижалари шуни кўрсатдики, қурбонларнинг аксариятининг ўлимига силласи қуриш (очлик) сабаб бўлган, қолганлари эса нафас қисиши, бўғиб ўлдирилиш ёки бош жароҳатларидан вафот этган.
Қатор ҳолатларда жасадларнинг чириб кетгани туфайли ўлим сабабини аниқлашнинг имкони бўлмади. Сектадаги баъзи жабрланганлар эса шу қадар ҳолдан тойган эдики, қутқарилганидан кўп ўтмай вафот этди.
Судья Мочаче қотилликларни «совуққонлик ва ҳисоб-китоб билан қилинган» деб таърифлаб, айбдорлар ҳеч қандай пушаймонлик билдирмаганини ва ҳатто ўзлари ҳам очликдан ўлишга тайёр эканлигини айтганини таъкидлади.
Бироқ, унинг хулосасига кўра, ишнинг оғирлиги ўлим жазо чорасини кўриб чиқишга асос бўлса-да, бундай ҳукмни чиқаришдан бош тортди.
«Шунга қарамай, суд айбланувчилардан бирортасини ўлим жазосига ҳукм қилишни мақсадга мувофиқ деб ҳисобламайди», — деди у ҳамда олий жазо чораси тузалиш ва аввалги эътиқодларидан воз кечиш учун ҳар қандай имкониятни йўққа чиқаришини қўшимча қилди. Кенияда 1987 йилдан бери ўлим ҳукмлари ижро этилмаган.
Маккензининг 28 нафар шериги орасида унинг оч қолиш ҳақидаги буйруқларига риоя қилинишини назорат этган қўриқчилар ва қурбонларнинг жасадларини оммавий қабрларга кўмиш билан шуғулланган одамлар бор. Улар 160 йилгача бўлган турли муддатларга ҳукм қилинди.
