АҚШ биринчи хоними Мелания Трамп Оқ уйда Россия ва Украина вакиллари билан Олешкидаги гуманитар миссия якунлари бўйича учрашув ўтказди. Учрашувда Россия номидан омбудсман Яна Лантратова ва президентнинг махсус вакили Кирилл Дмитриев, Украина номидан омбудсман Дмитро Лубинец ҳамда «Слуга народа» партиясининг парламентдаги фракцияси раҳбари Давид Арахамия иштирок этди.
Биринчи хоним ўз нутқида гуманитар миссияни тайёрлашнинг ҳар бир босқичида иштирок этгани ҳақида айтиб берган. «Миналардан тозалаш режалари ва аэрофотосуратлар ўрганилди, йўллар ҳолати баҳоланди, эвакуация йўналишлари, тиббиёт муассасалари бор-йўқлиги, транспорт воситаларидан фойдаланиш имкониятлари ва тиббий ресурсларни тақсимлаш муҳокама қилинди. Мен операциянинг муддати ва вақтига оид барча тафсилотлардан хабардор эдим. Менсиз оташкесим бўлмасди», – деди Мелания Трамп.
Мелания Трамп Олешки шаҳрида эришилган олти кунлик сулҳ «янада мустаҳкам тинчлик»ка олиб келишига умид билдирган.
«Умид қиламанки, Олешки тажрибаси янада мустаҳкам тинчликка эришиш учун туртки бўлади. Ҳар қандай катта ўзгариш кичик бир учқундан бошланади», – дейди у.
Унинг маълум қилишича, Олешкидан 800 га яқин киши олиб чиқилган. Россия томони ҳам, Украина томони ҳам аниқ рақамларни келтирмаган. Яна Лантратова гуманитар миссия якунланганидан кўп вақт ўтмай берган интервюсида 750 кишида Украина ёки Россияга кетиш имконияти бўлгани, аммо бу таклифни ҳамма ҳам қабул қилмаганини айтганди. Дмитро Лубинец эса томонлар Олешкидан Украинага қанча одам, Россияга қанча одам кетгани ҳақидаги маълумотларни очиқламасликка келишиб олгани ҳақида гапирган.
Мелания Трамп Олешкидаги оташкесим Россия ва Украина президентлари иштирокисиз бўлмаганини қайд этган. У президентларнинг бу борадаги ҳамкорлиги «бутун минтақада тинчликни илгари суриш учун муҳим прецедент яратиши»ни таъкидлаган. У Арахамия ва Дмитриев орқали Володимир Зеленский ва Владимир Путинга етказиш учун шахсий мактубларини топширди.
Учрашувда АҚШ биринчи хонимидан кейин Кирилл Дмитриев сўзга чиққан. У Меланияга «кўплаб ҳаётларни» сақлаб қолгани учун миннатдорчилик билдирган. Дмитриев унга шаҳардан эвакуация қилинган 11 ёшли Лидия чизган расмни совға қилди. Унда шундай ёзилган: «Мен Меланияни севаман».
