Путиннинг вакили Оқ уйда
5 ноябр куни АҚШ президенти Доналд Трамп Оқ уйда Россия президенти Владимир Путиннинг махсус вакили Кирилл Дмитриев билан ёпиқ эшиклар ортида учрашди. Reuters’нинг ёзишича, Трамп суҳбат мазмунини ошкор қилмади, бироқ яқин орада келишувга эришилиши мумкинлигини айтди. У Украина делегацияси билан учрашмаган.
«Бу катта келишув бўлади ва у Украинадан кўпроғини қамраб олади... Ҳатто бутун Европани қамраб олиши мумкин», деди Трамп журналистларга. 10–11 ноябр кунлари Абу-Дабида АҚШ воситачилигида Россия ва Украина вакиллари ўртасида музокаралар бўлиши режалаштирилган.
Дмитриев Оқ уйга АҚШ биринчи хоними Мелания Трамп ташкил этган тадбир учун келганди. Тадбир Россия назоратидаги Олешки шаҳрида эълон қилинган олти кунлик ўт очишни тўхтатишга бағишланди. Мелания Трамп сўзларига кўра, қисқа муддатда шаҳардан 800 га яқин киши эвакуация қилинган. Тадбирда Мелания Путин ва Зеленскийга аталган мактубларни уларнинг вакилларига топширди.
Шу куни Трампнинг вакили Жаред Кушнер ҳам Брюсселда музокаралар ўтказди. Унда НАТО ва европалик ҳамкорлар билан Украинага хавфсизлик кафолатлари ва Европа хавфсизлиги тизими муҳокама қилинган.
Бу 3 ноябрдаги оралиқ сайловлардан кейин россиялик ва америкалик расмийлар ўртасидаги илк юзма-юз мулоқот бўлди. Январдан ишлай бошлайдиган янги Конгресс Украинага ёрдамни кўпайтиришга интилиши кутилмоқда.
Кремл Трамп республикачилар мағлубиятига қарамай тинчлик саъй-ҳаракатларини давом эттиришидан умидвор эканини билдирган.
Европадаги ёлғон таҳдидлар
5 ноябр куни Европада йўловчи самолётларига бомба қўйилгани ҳақидаги ёлғон таҳдидлар сабаб қарийб 30 та рейс издан чиқди. Айрим самолётлар режадан ташқари қўнишга мажбур бўлди, баъзиларини эса қирувчи самолётлар кузатиб борди.
Энг жиддий ҳолат Францияда кузатилди. Дублиндан Римга учаётган Aer Lingus самолёти учувчиси ҳокимият билан кутилганидек ҳамкорлик қилмади. Шундан сўнг Франция бош вазири қирувчи самолётлар юбориб, лайнерни Эврёдаги ҳарбий авиабазага қўндиришни буюрди. Болгария ҳарбий ҳаво кучлари эса учта йўловчи самолётини ерга қўнгунча кузатиб борди. Мадрид, Варшава ва Копенгагенда ҳам самолётлар тўхтатилиб, текширувдан ўтказилди.
Италияда эса икки аэропортга таҳдид ҳақида электрон хат келган: муаллифлар Хелсинки ва Дублиндан келаётган самолётларга портловчи мослама қўйилганини ва улар 60 дақиқада портлашини ёзган.
