АҚШ Конгрессига 9 ноябр, душанба куни мамлакат мудофаа вазири Пит Ҳегсетга нисбатан импичмент эълон қилиш тўғрисидаги резолюция лойиҳаси киритилди. Ҳужжатни Вакиллар палатасининг Республикачилар партиясидан сайланган аъзоси Томас Мэсси тақдим этди. Бу ҳақда dpa ахборот агентлиги хабар берди.
34 саҳифадан иборат резолюция лойиҳаси саккизта айблов моддасини ўз ичига олади. Уларнинг учтаси Эронга қарши уруш билан боғлиқ. Мэсси Ҳегсетни Конгресс рухсатисиз ушбу урушни бошлаганликда айбламоқда.
Ҳужжатда, шунингдек, Ямандаги ҳарбий ҳаракатлар, АҚШ ҳарбийларининг Кариб денгизида гиёҳванд моддалар савдоси билан шуғулланувчи кемаларга қарши зарбалар бергани ҳақидаги даъволар ҳамда Венесуэла президенти Николас Мадурони қўлга олиш амалиёти тилга олинган.
«У (Ҳегсет — таҳр.) Конгресснинг уруш эълон қилиш ваколатига оид қарорларини эътиборсиз қолдириб, хорижий давлатлар раҳбарларини ўғирлаш ва Трамп маъмурияти танқидчиларини қўрқитиш орқали ўз хизмат ваколатларини суиистеъмол қилмоқда. Шунингдек, у танқидчиларни сўз эркинлиги ҳуқуқидан фойдалангани учун таъқиб қилмоқда», — деди Мэсси.
АҚШ президенти Доналд Трамп Ҳегсетни лавозимидан четлатиш ташаббусига муносабат билдириб, мудофаа вазири «жуда яхши ишлаганини» таъкидлади.
Оқ уй раҳбари Мэссини эса «мутлақ омадсиз» деб атади.
Ҳегсетнинг ўзи импичмент эълон қилишга қаратилган уринишлар уни «ташвишга солмаётганини» билдирди. Шунингдек, у 10 ноябр куни Пентагонда ушбу масала юзасидан брифинг ўтказилишини маълум қилди.
Ҳегсетга импичмент эълон қилиш эҳтимоли қандай?
Вакиллар палатаси Мэссининг таклифини шу ҳафтанинг ўзида кўриб чиқиши кутилмоқда.
АҚШ парламенти қуйи палатасида Ҳегсетга нисбатан импичмент эълон қилиш учун оддий кўпчилик овози етарли бўлади.
Шундан сўнг масала Сенатда кўриб чиқилади. Мудофаа вазирини лавозимидан четлатиш учун эса юқори палата аъзоларининг камида учдан икки қисми ушбу қарорни қўллаб-қувватлаши талаб этилади, деб ёзмоқда dpa.
Бу жуда юқори талаб бўлиб, оралиқ сайловлар натижасида демократлар Сенат устидан назоратни қўлга киритганидан кейин ҳам зарур овозларни тўплаш қийин бўлиши мумкин.
