Ошкор этилган маълумотлар орасида исмлар, лавозимлар, туғилган саналар, ижтимоий суғурта рақамлари ва алоқа маълумотлари ҳам бўлиши мумкин, деб хабар берди ABC News АҚШ Мудофаа вазирлиги вакилига таяниб.
Ҳужум Defense Manpower Data Center (DMDC) ахборот тизимида содир бўлган. У ҳарбий объектлар ва компьютер тармоқларига кириш имконини берувчи Мудофаа вазирлиги гувоҳномаларининг шахсини тасдиқлаш учун жавобгардир. Марказда жами 60 миллиондан ортиқ ёзув сақланади. Federal News Network маълумотлар шифрланмаганини ёзмоқда. Ноқонуний кириш биринчи марта 2025 йил октябрь ойида содир бўлган. Фақат 16 июль куни мутахассислар заифликни бартараф этган. Пентагоннинг таъкидлашича, маълумотларга оз сонли фойдаланувчи кириш ҳуқуқига эга бўлган.
Сизиб чиқиш бошқа шунга ўхшаш воқеадан бир ҳафта ўтар-ўтмас маълум бўлди. ShinyHunters гуруҳи ФҚБ ишга жойлашиш учун номзодларнинг асосий портали — FBIJobs базасига ноқонуний кирганини маълум қилди. ФҚБ терговни тасдиқлади ва ҳар бир ходимининг шахсий маълумотлари ошкор қилинган бўлиш эҳтимолини истисно қилмаяпти. Улар орасида уй манзиллари, шахсий ва иш телефонлари, туғилган саналар, ижтимоий суғурта рақамлари ва қариндошларнинг алоқа маълумотлари бор. Хакерлар ҳатто ФҚБ ходимларининг тиббий маълумотлари — текширувлар, таҳлиллар ва касбга яроқлилик тестлари, шунингдек, психиатрик баҳолаш натижаларини ҳам қўлга киритган. Маълумотларда буюрилган дори-дармонлар, электрокардиограмма натижалари, аллергия ва депрессия белгилари ҳақида маълумотлар мавжуд.
ShinyHunters ўғирланган маълумотларнинг бир қисмини аллақачон журналистларга тақдим этган. Reuters агентлиги 5 минг ёзувдан иборат жадвални ўрганиб чиқди. Унда Хитой, Россия, Эрон ва «Ҳизбуллоҳ» билан шуғулланадиган, телекоммуникацияларда яширин техник кузатув олиб борадиган бўлинмалар ходимлари кўрсатилган. Журналистлар танланмадаги 20 киши ҳақидаги маълумотларни рост эканини тасдиқлади.
