Россия делегацияси Абу-Дабидаги музокараларда Донбасснинг босиб олинган ҳудудлари майдонини бўрттириб кўрсатди, деди Володимир Зеленский.
Украина делегацияси ҳисоботига таяниб гапирган Зеленскийнинг сўзларига кўра, «россияликлар Донбасснинг Украина назоратида қолаётган ярми ҳам аллақачон босиб олинган деб ҳисоблайди».
Булар Россия разведкасидаги ҳарбий офицерлар эди ва улар буни жиддий туриб айтишган. Бизнинг жамоа уларга шундай деган: «Бундай гапларни қандай қилиб айта олаётганингизни умуман тушунмаяпмиз. Бу ҳудудлар бизнинг назоратимизда эканини исботловчи видеоёзувлар, суратлар ва бошқа далилларимиз бор».
Зеленский Владимир Путин «бошқа реалликда яшаётгани»ни таъкидлаган. «Табиийки, у америкаликларга Украина шарқини тўлиқ босиб олиш учун бир-икки ой қолганини айтади. Мен ҳам унга Россияни бутунлай босиб олганим акс этган суратни чизиб беришим мумкин. Лекин бу нотўғри», – дейди Украина президенти.
Унинг қўшимча қилишича, Америка томони Украинанинг жанг майдонидаги вазият бўйича баҳосини тасдиқлаган. «Айнан шунинг учун биз ўтириб, етакчилар даражасида гаплашиб олишимиз керак», – дея хулоса қилган Зеленский.
Музокараларнинг биринчи куни қандай ўтди?
10 ноябр куни Абу-Дабида Россия ва Украина делегацияларининг АҚШ воситачилигидаги музокараларининг биринчи куни бўлиб ўтди. Россия делегациясига (ўтган сафарларда бўлгани каби) Путиннинг ёрдамчиси, Россия ҳарбий тарих жамияти раҳбари Владимир Мединский раҳбарлик қилди, Украина делегациясига эса Ташқи разведка хизмати раҳбари Рустем Умеров бошчилик қилмоқда.
Биринчи кунда томонлар қарийб тўрт соат мобайнида мулоқот қилишган. Бугун иккинчи босқич ўтказилади.
Украина президенти Володимир Зеленский биринчи кунни «конструктив ва анча мазмунли» деб атади, бироқ шуни қайд этди: «Россияликлар билан тил топишиш қийин. Улар, юмшоқ қилиб айтганда, бизнинг энг яхши дўстларимиз эмас». АҚШ Давлат котиби Марко Рубио (у ҳам учрашувда қатнашмади) музокаралар «жуда самарали» ўтганини маълум қилди, аммо олдинда ҳали «кўп иш» борлигини қайд этди. Россия вакиллари эса эртага матбуот учун брифинг ўтказишга ваъда берди.
