Kun.uz: Tailandning janubida joylashgan Songkla viloyatida odam savdogarlari lagerida Myanma va Bangladeshdan kelgan 800 nafardan ortiq kishi tutqunlikda ushlab turilgan. Shuningdek, ushbu lager o‘rnida ommaviy qabr topilgan. Bu haqda
Bangkok Post nashri xabar bermoqda.
Avvalroq politsiya 26 nafar muhojirning jasadi eksgumatsiya qilinganini ma'lum qilgandi.
Lager haqida batafsil ma'lumotni Tailand xavfsizlik kuchlari lagerni qo‘lga olishmoqchi bo‘lganda lagerdan qochib ketishga muvaffaq bo‘lgan 14 va 17 yoshli ikki asir o‘smir aytib berdi. O‘smirlarning aytishicha, ular lagerda 8 oydan berib ushlab turilgan. Hammasi bo‘lib bu lagerda Myanmaning Arakan shtatida yashovchi roxinja millatiga mansub 800 dan ortiq muhojir ushlab turilgan. Barcha asirlar lagerga xavfsizlik kuchlari bostirib kirganlarida lager tashkilotchilari tomonidan tarqatib yuborilgan.
Qabrdan jasadlarni kovlab olishda ishlagan 100 dan ortiq kriminalistlar marhumlar oxirgi oylarda turli sabablar, asosan ochlikdan vafot etgan, degan umumiy xulosaga kelgan.
“Lagerda o‘zining keyingi harakatlanishi uchun pul to‘lay olmaganlar ushlab turilgan. Xo‘jayinlarga bizning tirik yoki o‘lik bo‘lishimizning farqi yo‘q edi. Bizga kamdan-kam hollarda ovqat berishardi, yuvinib olishga dush ham yo‘q edi, kasallar esa o‘limga mahkum edi”, deb aytdi qabrlardan biridan tirik holda topilgan Anuzar ismli asir.
U lagerni 8 nafar jinoyatchi boshqargani, ular orasida roxinja va malay millatiga mansub shaxslar bo‘lganini ma'lum qilgan.
Roxinja millati vakillari bo‘lmish bengaliyalik musulmonlar Myanmaning Arakan shtatini myanmalik buddistlar bilan diniy to‘qnashuvlar oqibatida hamda mehnat muhojirlari sifatida ommaviy ravishda tark etmoqda. Pul evaziga muhojirlarning harakatlanishini roxinjalarni Tailandga va undan keyin dengiz orqali Janubi-sharqiy Osiyoning musulmon davlatlariga olib o‘tishni tashkil qiluvchi noqonuniy guruhlar ta'minlaydi. Ko‘pincha muhojirlar bilan to‘lib-toshgan qayiqlar suv ostiga g‘arq bo‘lib, yuzlab odamlar yo‘lda halok bo‘ladi.
