Ostonada Qozog‘iston tarixidagi eng katta miqyosdagi harbiy parad bo‘lib o‘tdi

7 may kunida Ostonada, “Qazaq yelі” bosh maydonida Vatan himoyachisi kuni va Ikkinchi jahon urushidagi g‘alabaning 70 yilligiga bag‘ishlangan katta miqyosdagi harbiy parad o‘tkazildi.

Bu parad Qozog‘iston tarixidagi eng katta parad bo‘ldi. Unda 5 mingga yaqin harbiy xizmatchi va 200dan ko‘proq qurol-aslaha va harbiy texnika birligi, harbiy aviatsiyaning 70ta vertolyot va samolyoti ishtirok etdi.

Qozog‘istonning barcha burchaklaridan kelgan 260 nafar urush faxriysi bu tantanali tadbirning faxriy mehmonxonlari bo‘ldi. Harbiy paraddan keyin faxriylar turli bayram konsertlarida, Vatan himoyachilari yodgorligiga gulchambarlar qo‘yish marosimida ishtirok etdilar, ular uchun shahar bo‘ylab ekskursiya tashkil etildi. Ostona, Olma-Ota, Qarag‘anda, Pavlodar shaharlaridan hamda Olmaota va Janubiy Qozog‘iston viloyatlaridan 6 nafar ulug‘ vatan ishtirokchisi Moskvaga G‘alabaning yubileyini nishonlash uchun boradigan bo‘ldi.

Harbiy parad uchta qismdan: piyoda parad qo‘shinlarning o‘tishi, mexanizatsiyalashtirilgan kolonnalarning o‘tishi va havo paradidan tashkil topdi.

Paraddan avval Qozog‘iston Respublikasi Davlat bayrog‘i bayroqdor guruhi o‘tdi. Undan keyin G‘alaba bayrog‘i – 70 yil avval Reyxstag ustida qozog‘istonlik mashhur urush faxriysi Raximjon Qoshqarbayev va uning polkdoshi Grigoriy Bulatov tomonidan o‘rnatilgan bayroqning aniq nusxasi olib o‘tildi. Jangavor bayroq Qozog‘istonga Moskvadagi Poklonnaya goradan olib kelindi.

Qozog‘iston prezidenti tantanali safni aylanib chiqdi, qo‘shinlar Oliy Bosh qo‘mondonni qizg‘in olqishladilar. Nursulton Nazarboyev barcha harbiy xizmatchilarni Vatan himoyachisi kuni va G‘alabaning 70 yillik yubileyi bilan tabrikladi. Bunga javoban parad ishtirokchilar uch marta “URA” deb hayqirishgan.

So‘ngra Ulug‘ vatan urushi vaqtidagi harbiy kiyimdagi uchta parad bo‘linmasi o‘tdi, ulardan birinchisi 72-gvardiya o‘qchi diviziyasi jangavor bayrog‘i bilan o‘tdi. Aynan shu diviziya tarkibida qozog‘istonliklar urush paytida jang qilishgan. So‘ngra yurishni Qozog‘iston Mudofaa vazirligi zobitlari, quruqlikdagi qo‘shinlar, Havo mudofaasi kuchlari va harbiy-dengiz kuchlarining parad bo‘linmalari davom ettirishdi.

Paradning ikkinchi qismida mexanizatsiyalashgan kolonnalar o‘tdi. Paradning tarixiy qismida harbiy texnika kolonnasiga urush paytidagi T-34 tanki boshchilik qildi. Shuningdek, paradning tarixiy qismida ZiL-157 yuk mashinasi, tanklarga qarshi ZIS-2 pushkalari, M-30 gaubitsalari, afsonaviy BM-13 reaktiv yalpi o‘t ochish tizimi “Katyusha” ham o‘tdi.

Harbiy texnikaning zamonaviy qismiga T-72B tanki boshchilik qildi, undan keyin D-30 gaubitsali jangovor mashinalari, “KamAZ” avtomobillari, “Tigr” zirhli mashinalari, “Kobra” razvedka mashinalari va oxirgi yillarda Qozog‘iston armiyasi qurollanishida bo‘lgan boshqa zamonaviy harbiy texnika o‘tdi.

Paradning uchinchi yakunlovchi qismida avia-shou namoyish etildi. Ostona osmoni uzra yagona havo safida Su-25, Su-27, Su-30, MiG-29, MiG-31, MiG-27, An-26, An-72, Tu-134, Tu-154, S-295 (Airbase Military), samolyotlari va Mi-8, Mi-17, Mi-171, Mi-26, K-32 i YeS-145 (Yevrokopter) vertolyotlaridan tashkil topgan 70 ta aviatsion texnika birligi parvoz qildi. Paradda 4++ avlodidagi Su-30SM  qiruvchi samolyotlari ham ishtirok etdi.

Yuqori darajadagi uchuvchilik mahoratining namoyon qilinishi avia-shouning eng yorqin va esda qolarli qismi bo‘ldi. Uchuvchilar G‘alabaning 70 yillik yubileyi ramzi sifatida osmonda “70” raqamini hosil qilib uchishdi. SU-27 samolyotlari ham raketalar uchirish yordamida “70” raqamini tasvirlashdi. Parad aynan shu ramziy sovg‘a bilan nihoyalandi.