Ravshan Haydarov: "Jahon Chempionatiga boradigan tarkibning o‘zagi aniq"

O‘zbekiston yoshlar terma jamoasi bosh murabbiyi Ravshan Haydarov Qirg‘izistonga qarshi o‘yindan keyin mahalliy OAV muhbiri bilan suhbatda Jahon Chempionati haqida o‘z fikrlarini bildirib o‘tdi deb xabar berdi the-uff.com.

"Uch kunlik yig‘inimiz doirasida Qirg‘izistonga qarshi o‘yin rejalashtirilgandi. Raqibimiz safida bizdan katta yoshdagi futbolchilar o‘ynashadi. Bugungi bahsga jiddiy tarzda yondoshdik. Bugun birinchi bo‘limda yaxshi o‘ynadik. Ikkinchi bo‘limda esa xotirjamlik deya olmayman, oddiy qo‘pol xatolar sodir bo‘ldi. Birinchi gol o‘tkazib yuborilgan vaqtda markaziy himoyachilarimiz to‘pni yo‘qotishdi. Ikkinchi golga kelsak, Akrom Komilovning qo‘pol xatosidan so‘ng penalti belgilandi. Yigitlar bilan ushbu xatolarni ko‘rib chiqamiz, tayyorgarlik jarayonida bu tabiiy holat", - deydi Ravshan Haydarov.

"Ushbu yig‘inda ikki nafar asosiy futbolchimiz ishtirok etmadi. Javohir Sohibov va Odil Hamrobekov o‘z klublari safida OChLdagi muhim o‘yinlarda ishtirok etishdi".

"Jamshid Boltaboyev jarohati tufayli mundialga bormasligi aniq bo‘ldi. U hali individual tarzda ham mashg‘ulotlarni boshlagani yo‘q. Boltaboyev yarim himoyada ijodkor futbolchi hisoblanadi. Biroq uning o‘rnini bosadigan o‘yinchilar topiladi deb o‘ylayman".

"11 maydan Toshkentda navbatdagi yig‘inni boshlaymiz. Bu yig‘in doirasida "Oq-tepa" bilan o‘rtoqlik uchrashuvini o‘tkazamiz. 19 mayda yurtimizdagi yig‘inni tugatamiz. 20 mayda yo‘lga chiqamiz, 22 mayda Yangi Zelandiyaga yetib boramiz. 2 kun o‘tgach Vellingtonda Panamaga qarshi o‘rtoqlik uchrashuvini o‘tkazamiz. 28 may kuni Kraystcherch shahriga yetib boramiz. Aynan o‘sha yerda Gondurasga qarshi ilk uchrashuvimizni o‘tkazamiz".

"Jahon chempionatiga boradigan tarkibni shu kunlarda e'lon qilaman. Lekin jamoaning o‘zagi deyarli aniq. Yig‘inda 21 nafar futbolchi qatnashdi. Sohibov va Hamrobekovni qo‘shsak 23 nafar bo‘ladi", deya so‘ziga yakun yasadi Haydarov.

Eslatib o‘tamiz, yoshlar o‘rtasidagi jahon chempionatiga 30 may kuni start beriladi.