Toshkentning Uchtepa tumanida joylashgan “Bog‘obod” mahallasi raisi B. Qosimov mehnat fronti faxriysi, 96 yoshli qariya ayolga mahalla qo‘mitasi nomidan tez tayyorlanadigan lag‘monlar (lapshalar) berilgani haqidagi xabarlarni rad etdi. Bu haqda UZ24 xabar bermoqda.
Mahalla qo‘mitasining so‘zlariga ko‘ra, ushbu lapshalar shu mahallada istiqomat qiluvchi tadbirkor tomonidan, o‘z tashabbusi bilan 50 oilada istiqomat qilayotgan qariyalarga tarqatilgan va bunga mahalla qo‘mitasining aloqasi yo‘q.
Avvalroq, Facebook’dagi “Jamoatchilik nazorati” guruhida bir ayolning bobosiga 9 may kuni munosabati bilan sovg‘a sifatida bir necha qadoq lapsha tashlab ketishgani haqida jahl bilan xabar qoldirilgandi. Mahalla qo‘mitasining aniqlik kiritishicha, sovg‘a murojaatchi ayolning bobosi emas, buvisiga berilgan; murojaatchi keyinroq Facebook’dagi postini o‘chirib tashlagan.
B. Qosimovning qo‘shimcha qilishicha, Ikkinchi jahon urushida ishtirok etgan mahallaning ikki fuqarosiga televizorlarga sovg‘a qilingan, yaqin vaqt ichida mahalladagi har bir faxriyga munosib sovg‘alar beriladi. Hozirgi vaqtda “Bog‘obod” mahallasida 28 nafar mehnat fronti, 2 nafar urush faxriysi istiqomat qilmoqda.