Android One dasturining ta'siri borgan sari kengayib bormoqda: Turkiyada 15 maydan sotuvga chiqariladigan General Mobile 4G smartfoni namoyish qilindi.
Android One dasturining g‘oyasi Android operatsion tizimida ishlaydigan arzon uyali telefonlar yaratishda ishlab chiqaruvchilarga yordam berishdan iborat. Buning uchun Google kompaniyasi keyinchalik boshqa kompaniyalar o‘zlarining qurilmalarida asos sifatida foydalanishlari mumkin bo‘lgan etalon platformalar yaratadi.
Hozirgacha Android One qurilmalari anchagina o‘rta miyona ko‘rsatkichlarga ega edi. Bunday qurilmalar odatda 854 × 480 piksel ko‘rsatish qobiliyatiga ega 4,5 dyuymli ekran, 4 ta yadroga ega MediaTek protsessori, 1 Gb tezkor xotira hamda 4 yoki 8 Gb li flesh-xotira bilan jihozlanardi.
General Mobile 4G hozirgi kunda Android One smartfonlari ichida eng quvvatlisi hisoblanadi. Yangi qurilma 4 ta ARM Cortex A53 yadrosiga ega 64 bitli Qualcomm Snapdragon 410 protsessori va Adreno 306 grafik kontrollyori asosida yaratilgan. Qurilmaning tezkor xotirasi 2 Gbni, flesh-xotirasi 16 Gb ni tashkil qiladi.
Shuningdek, smartfon 1280 × 720 pikselli 5 dyuymli sensorli ekran bilan jihozlangan. Ekran tashqi ta'sirlardan Gorilla Glass 4 oynasi bilan himoyalangan. Smartfonning old qismida selfi ishqibozlari uchun 5 Mp li kamera, orqa tomonida esa svetodiodli vspishkaga ega 13 Mp li asosiy kamera o‘rnatilgan.
Smartfonga ikki yil ichida yangilanib turilishi kafolatlangan Android 5.1.1 operatsion tizimi o‘rnatilgan. 4-avlod LTE mobil tarmoqlarida ishlashni qo‘llab-quvvatlaydi.
Mobile 4G ning narxi 260 dollarga yaqinni tashkil qilishi taxmin qilinmoqda, bu esa avvalroq ishlab chiqarilgan, 100-110 dollarga taklif qilinayotgan Android One qurilmalaridan ancha qimmatroq narxni tashkil etadi.