Bugun O‘zbekiston U23 termasi taqdiri hal bo‘ladi

Bugun Baxtiyor Ashurmatov boshchiligidagi O‘zbekiston U23 terma jamoasi taqdiri hal bo‘ladi.

Xabaringiz bor, olimpiyachilarimiz o‘z guruhlarida ikkinchi o‘rinni egallab, kelasi yili Qatarda bo‘ladigan Osiyo chempionati yo‘llanmasiga to‘g‘ridan-to‘g‘ri yo‘llanmaga egalik qilisha olmagandi. Endilikda Ashurmatov shogirdlari bugun bo‘lib o‘tadigan "V" guruhining so‘nggi o‘yinlari natijasini poylashga majburlar.

Bugun ushbu guruhda Iordaniya - Kuvayt va Pokiston - Qirg‘iziston termalari o‘zaro kuch sinashib, guruh o‘yinlariga yakun yasab berishadi. Iordaniya ikkita o‘yinda ikkita g‘alabaga erishib, OCh yo‘llanmasini o‘zi uchun ijobiy hal qilib bo‘ldi. Kuvayt esa birinchi turda Qirg‘iziston bilan durang o‘ynab, ikkinchi turda Pokistonni 2:0 hisobida mag‘lub etgan.

Qisqa qilib tushuntiradigan bo‘lsak, biz Osiyo Chempionatiga yo‘llanma olishimiz uchun bugun Iordaniya Kuvaytni yengishi kerak yoki durang o‘ynashi lozim. Aks holda, O‘zbekiston U23 termasi guruhda qolib ketadi.

Eslatib o‘tamiz, o‘tgan yilgi mavsum yakunlariga bag‘ishlangan tadbirda O‘FF prezidenti Mirabror Usmonov agar Rio-2016 Olimpiadasi yo‘llanmasi ijobiy hal qilinmasa, O‘zbekiston U23 termasi bosh murabbiyi, TJM direktori Asqar Tolibjonov va TJM Texnik direktori Rustam Akramovlar o‘z lavozimidan chetlatilishi haqida aytib o‘tgandi.

Manba: uff.uz