24 may kuni Polshada prezident saylanadi

24 may kunida Polshada prezidentlik saylovlarining ikkinchi bosqichi bo‘lib o‘tadi. Saylovlarning birinchi bosqichidan so‘ng, mamlakat prezidenti lavozimiga amaldagi prezident Bronislav Komorovskiy va “Qonun va adolat” muxolif partiyasidan nomzod Anjyey Duda da'vogarlik qilmoqda.

Polsha Davlat saylov komissiyasining xabar berishicha, saylovning bu bosqichi ham birinchi bosqichdagi kabi shartlar va o‘sha saylov uchastkalarida bo‘lib o‘tadi. Ertalabki soat 7 dan kechki soat 9 gacha mamlakatning barcha hududlarida, shu jumladan, xorijiy davlatlardagi 27 ming saylov uchastkalarida saylovchilar ovoz berishlari mumkin bo‘ladi.

Millward Brown S.A. agentligi o‘tkazgan so‘rovnomaga ko‘ra, 45,8 foiz saylovchilar o‘z ovozlarini Anjyey Dudaga, 45,3 foiz saylovchilar esa o‘z ovozlarini Bronislav Komorovskiyga berishga tayyorliklarini ma'lum qilishgan.