Amsterdamda 3D-printer yordamida ko‘prik yaratiladi

Niderlandiyalik arxitektorlar Amsterdamdagi kanallardan biri ustidan o‘tuvchi ko‘prikni 3D-printer yordamida “bosib”, 3D-printerlardan qurilish sohasida foydalanishdagi tajribalarni ilg‘or surishga qaror qilishdi.

“Kompyuterra” portalining xabar berishicha, 3D-printerda ko‘prikni yaratish loyihasi uchta yirik kompaniya: Heijmans developeri, istiqbolli texnologiyalar laboratoriyasi JorisLaarman va 3D-printerlar ishlab chiqaruvchi MX3D kompaniyasi tomonidan tashkil etilgan. Niderlandiya poytaxtidagi kanallardan birining ustidan o‘tuvchi po‘latdan ishlangan yo‘lovchilar ko‘prigi 6ta erkinlik darajasiga ega MX3D Metal robotlashtirilgan qo‘li yordamida yasaladi. Bunday robot o‘zida payvandlash va metallni uzluksiz berib turuvchi moslamani mujassamlashtirgan qurilmani boshqaradi.

Shu tariqa ko‘prik metallning suyultirilgan mayda tomchilaridan uzluksiz payvandlash choki tarzida quriladi. Bunday konstruksiya listli metalldan anchagina yuqori mustahkamlikka ega bo‘ladi. Ko‘prikning yupqa “tayanch iplari” yuklamani yaxshi taqsimlaydi va shamol ta'sirini kamaytiradi.

Ko‘prik quriladigan joy sir saqlanmoqda. Ko‘prik loyihachilaridan biri Yoris Laarmanning aytishicha, loyiha o‘tmish bilan kelajak texnologiyasining qorishmasi sifatida namoyon bo‘ladi.

Eslatib o‘tamiz, Amsterdamda 3D-printerda ikki yildan beri avvalboshida “3D-printerda bosilgan ilk uy” deb atalgan 3D Print Canal House deb nomlanuvchi uch qavatli bino ishlanmoqda. Bu loyiha hali ham yakunlanmagan va qachon yakunlanishi ham noma'lumligicha qolmoqda, biroq loyiha tashkilotchilari o‘z saytlarida bu qurilish uch yilga mo‘ljallanganini aytishmoqda. Bu orada Xitoyda 3D-printerda o‘nlab villalar bosib chiqarilmoqda.