So‘zim tegishli bul dam,
Qishlog‘u shaharlikka.
Uyquga berib barham,
Turinglar saharlikka!
Shaytonni kuyuntirib,
Olovdan kiyintirib,
Allohni suyuntirib,
Turinglar saharlikka!
Subh dilni sato qilur,
Tangrim rizq ato qilur.
Turmagan xato qilur,
Turinglar saharlikka!
Tursak, gunohlar azon -
To‘kilar misli xazon.
Bu oy - mohi Ramazon,
Turinglar saharlikka!
Fayziyob subhi sodiq,
Olmagay bizdan soliq.
Bizni xalq qilgan Xoliq,
Turinglar saharlikka!
Bizga omonat bu jon,
Uni aylaylik omon.
"Allohu akbar", debon,
Turinglar saharlikka!
G‘aflat - do‘zaxiy o‘choq,
Yoxud shaytoniy quchoq.
Iblisga sanchib pichoq,
Turinglar saharlikka!
Kimki, g‘aflatdan nari,
Bo‘lmas kamu ko‘stlari.
Ey, Botirning do‘stlari,
Turinglar saharlikka!
Botirjon Ergashev