Samvel Babayanga maslahatchi sifatida xorijlik mutaxassis olib kelinadi

23 iyun kuni O‘zbekiston futbol federatsiyasida o‘tkazilgan navbatdan tashqari yig‘ilish vaqtida O‘zbekiston milliy terma jamoasi va O‘zbekiston olimpiya terma jamoasining bosh murabbiylari iste'foga chiqarildi.

Shuningdek, yig‘ilish davomida bir necha futbol mutasaddilariga qattiq hayfsan berilgan. Bu haqda "Pravda Vostoka" nashri yozgan.

Ta'kidlash joizki, keyingi 1 yil davomida O‘zbekiston milliy terma jamoasi 8ta o‘yin o‘tkazdi va atigi 2ta g‘alaba qayd etdi. Bu o‘yinlar bo‘yicha to‘plar nisbati ko‘rsatkichlari o‘ta yomon ahvolda - 9-16. Oxirgi vaqtlarda o‘tkazilgan uchrashuvlarda Yaponiya terma jamoasidan 1:5, KXDRdan esa 2:4 hisobida mag‘lub bo‘lindi.

Shuningdek, Olimpiya terma jamoasining natijalari ham maqtagulik bo‘lmagan. Olimpiyachilar boshqa terma jamoalarning o‘zaro natijasi va yordami evazigagina Braziliyaning Rio-de-Janeyro shahrida o‘tkaziladigan Olimpiada-2016 o‘yinlariga yo‘llanma olish uchun kurashni davom ettiradigan bo‘lgan.

Qolaversa, joriy mavsumda ichki chempionatdagi jamoalar ham xalqaro maydonlarda qoniqarsiz natijalar qayd etishdi. OChLda ishtirok etgan 4 jamoaning birontasi guruh bosqichidan o‘ta olmadi, faqat Qarshining "Nasaf" jamoasi o‘zining o‘yinlari bilan muxlislar ko‘ngliga taskin berib, mutaxassislarning ishonchiga sazovor bo‘ldi.

Majlisga O‘zbekiston Futbol Federatsiyasi prezidenti Mirabror Usmonov raislik qildi. Usmonov kun tartibidagi masalalar haqida gapirarkan, O‘zbekistonda hukumat yaratib berayotgan sharoitlarda unumli foydalanish kerakligini alohida ta'kidladi.

"O‘zbekiston Prezidenti millionlar o‘yiniga jiddiy e'tibor qaratish bo‘yicha ko‘rsatma bergan. Vazifalar bajarilyaptimi? Hosilni yig‘ish vaqti kelganda nimani ko‘rsatamiz? Sizlardan nega bunday bo‘layotganini so‘rash vaqti keldi. Murabbiylar va futbolchilardan natija talab qiladigan vaqt keldi. Mas'uliyatni oshirish kerak!

Men bir yildan beri milliy terma jamoaga xorijiy mutaxassisni jalb qilish bo‘yicha sizlarga taklif va mulohaza kiriting deyman, nega indamaysizlar? Qani taklif? Har qanday mablag‘ evaziga, har qanday mutaxassisni jalb etishga tayyor ekanligimni har majlisda takrorlasam ham hech biringiz indamaysiz! Nega Terma jamoalar markazi bu masalani ijobiy hal qilmay, bir yildan beri cho‘zib yuripti. Bu masalani shaxsiy nazoratim ostiga olaman va muhlat beraman. Navbatdagi o‘yinga tayyorgarlik boshlanguncha, terma jamoada xorijlik maslahatchi murabbiy ish boshlashi kerak. Tamom!", deydi O‘zbekiston futbol federatsiyasi prezidenti Mirabror Usmonov.

Yig‘ilishda Mirjalol Qosimov o‘z lavozimidan ozod etilib, uning o‘rniga "Paxtakor" bosh menejyeri sifatida faoliyat ko‘rsatib kelgan Samvel Babayan tayinlandi hamda unga terma jamoani 2018 yilgi jahon chempionatiga olib chiqish vazifasi topshirildi. Babayanga "Paxtakor" jamoasidagi lavozimini tark etib, bor e'tiborini terma jamoaga qaratish sharti qo‘yilgan. Unga biroz oldinroq Yangi Zelandiyada bo‘lib o‘tgan yoshlar o‘rtasidagi jahon chempionatida kuchli sakkizlikka kirgan O‘zbekiston yoshlariga murabbiylik qilgan Ravshan Haydarov yordamchilik qiladigan bo‘lgan.

Terma jamoalar markaziga 20 kun mobaynida Samvel Babayanga yana bir xorijlik mutaxassisni yordamchi-maslahatchi sifatida olib kelish vazifasi topshirigan.

Olimpiya terma jamoasiga esa Baxtiyor Ashurmatov o‘rniga Viktor Jalilov tayinlangan va unga Dilshod Nuraliyev yordamchilik qilishi aytilgan. Ularning oldiga Olimpiya terma jamoasi bilan 2016 yilgi Olimpiadaga yo‘llanma olish vazifasi qo‘yilgan.

Majlisda O‘zbekiston Futbol Federatsiyasining Bosh kotibi Sardor Rahmatullayev, O‘zbekiston Professional Futbol ligasining bosh direktori Farhod Magametov, O‘zbekiston Futbol Federatsiyasi matbuot kotibi Sanjar Rizayevlarga xayfsan e'lon qilindi. Terma jamoalar markazi direktori Asqar Tolibjonov, O‘zbekiston terma jamoalarining texnik direktori Rustam Akramovlar esa Usmonovdan va Ijroqo‘m a'zolaridan oxirgi xayfsan olishdi. Milliy terma va olimpiya terma jamoalarining oldiga qo‘yilgan vazifa bajarilmagan taqdirda Asqar Tolibjonov va Rustam Akramov o‘z vazifasidan ozod etilishi ma'lumot sifatida qabul qilindi.