Ogohlik talab etadigan mavsum

Yozning jazirama kunlari ham boshlandi. Bu paytda, ayniqsa, suv havzalari va plyajlar gavjum bo‘ladi. Ammo suv nafaqat salqinlik va huzur-halovat baxsh etadi, balki unda ko‘plab xavf-xatarlar ham yashiringan...

Mamlakatimizda bo‘sh vaqtni mazmunli o‘tkazish va hordiq chiqarish uchun zarur sharoitlar yaratish, sog‘lom turmush tarzini targ‘ib etish va bolalar sportini rivojlantirish masalalariga alohida e'tibor qaratilayotir. Buning samarasida suv havzalari va akvaparklar soni yil sayin ortib bormoqda. Shunga qaramasdan, shahar aholisining cho‘milishga mo‘ljallanmagan joylar – favvoralar, kanal va daryolarning xavfli joylarida cho‘milish holatlari hamon uchrab turibdi.

Toshkent shahar davlat sanitariya-epidemiologiya nazorati markazi mutaxassislarining so‘zlariga ko‘ra, ushbu havzalardagi ifloslangan suv cho‘miluvchilarda o‘tkir ichak infeksiyalari, gepatit, ichburug‘, ich terlama kabi kasalliklarning rivojlanishiga olib kelishi mumkin.

– Poytaxtimizdagi barcha suv havzalaridan olingan namunalar muntazam bakteriologik va kimyoviy tekshiruvdan o‘tkaziladi, – deydi Toshkent shahar davlat sanitariya-epidemiologiya nazorati markazi bo‘lim boshlig‘i Temur Musayev. – Suv havzalari va favvoralarda sanitariya-epidemiologik me'yorlarga mos kelmaydigan suv borligi aniqlansa, tegishli korxona va tashkilotlar rahbarlaridan suvni zararsizlantirish va yangilash talab qilinadi. Masalan, favvoralardagi suv yangilanmasligi bois tez ifloslanadi. Ularda cho‘milish bolalar uchun o‘ta xavfli. Negaki, cho‘milish paytida tasodifan suv yutib qo‘yishi ehtimoldan xoli emas.

Toshkent shahar favqulodda vaziyatlar boshqarmasi xodimlarining ta'kidlashicha, cho‘milishga mo‘ljallanmagan ochiq suv havzalari bolalar va kattalar hayoti uchun xavf tug‘dirishi mumkin. Kanallarda suvning sovuqligi, oqimning tezligi, daryolarda uchrab turadigan maishiy chiqindilar, ota-onalar mas'uliyatsizligi, shuningdek, cho‘milishga kelganlarning o‘ziga haddan ziyod ishonishi kabi omillar cho‘kish bilan bog‘liq baxtsiz hodisalarga sabab bo‘layotir.

Bu kabi hodisalarning oldini olish maqsadida Toshkent shahar favqulodda vaziyatlar boshqarmasi tuman hokimliklari, «Mahalla» xayriya jamoat fondi, «Kamolot» yoshlar ijtimoiy harakati va boshqa tashkilotlar bilan hamkorlikda cho‘milish xavfli bo‘lgan suv havzalari va kanallar qirg‘oqlarini har yili monitoring va nazorat qilib kelmoqda. Zarur joylarga qo‘riqlash va kuzatuv postlari o‘rnatilib, tunu kun navbatchilik yo‘lga qo‘yilgan.

– So‘nggi yillarda baxtsiz holatlar soni sezilarli darajada kamaygani kuzatilmoqda, – deydi Toshkent shahar favqulodda vaziyatlar boshqarmasi boshlig‘ining o‘rinbosari Husan Bobonov. – Buni ko‘p jihatdan aholi o‘rtasida seminarlar va tushuntirish ishlarining muntazam o‘tkazib kelinayotgani bilan izohlash mumkin. Bundan tashqari, qutqaruvchi-g‘avvoslar tayyorlash ishlari takomillashtirilib, kuzatuv postlari zamonaviy texnikalar bilan jihozlanmoqda.

Cho‘milish mavsumi ayni avjiga chiqqan bu palla bolalarga quvonch bag‘ishlash bilan bir qatorda, ota-onalardan o‘ta mas'uliyatli bo‘lishni talab etadi. Zero, bolalar xavfsizligi hamma narsadan ustundir.

Muhammad Qarshiboyev, O‘zA