Sankt-Peterburgning "Zenit" jamoasini birdaniga uch nafar tajribali futbolchi tark etdi. Andrey Arshavin, Aleksandr Kerjakov va Anatoliy Timoshchuk bilan shartnoma uzaytirilmadi.
Jamoa bosh murabbiyi Andre Villash-Boash bu uch nafar futbolchi keyingi mavsum uchun o‘zi tuzadigan tarkibda bo‘lmasligini ma'lum qilgan. Jamoa rahbariyati bu murabbiyga keng vakolatlar berib qo‘ygani ko‘plab muxlislarning noroziligiga sabab bo‘lgan.
Qayd etish joizki, Arshavin va Kerjakov "Zenit"ning ichki chempionat va xalqaro maydonlarda uzoq kutilgan g‘alabalarining asosiy ijodkorlari bo‘lishgan edi. Arshavin 2008 yilda jamoaning UYeFA Kubogida zafar quchishida asosiy ishni bajargan va jamoa bilan ichki chempionatda uch marta oltin medallarga ega chiqqan. Kerjakov esa jamoadagi o‘yinlari orqali nafaqat "Zenit" tarixidagi, balk Rossiya futboli tarixidagi eng yaxshi to‘purar bo‘lishga erishgan.
Arshavin 2012 yilda "Arsenal"ni tark etgach, futbolga qiziqishi yo‘qoldi va o‘tmishda o‘yinlariga hurmat sifatida "Zenit"ga qabul qilindi. Kerjakov ham vaqt o‘tib, sport formasini yo‘qotdi va 1527 daqiqalik "golsiz" seriyani qayd etdi. 2014-2015 yillar mavsumida har ikki futbolchi ham deyarli maydonga tushirilmadi. Jamoa ularning o‘yinlarisiz mamlakat chempionligiga erishdi.
"Kerjakov mening keyingi mavsumdagi rejalarimdan o‘rin olmaydi. Arshavin va Timoshchuk bilan esa shartnoma yakunlandi. Ularga keyingi faoliyatida omad tilaymiz", deb bayonot beradi Villash-Boash.
Kerjakov bu bayonotni esankiragan holda qarshi oldi.
"Sen 32 yoshdasa. 3 hafta oldin Rossiya terma jamoasi safida gol urganding. Lekin, endi bilishingcha, klubing bosh murabbiyi seni o‘quv-yig‘iniga olib ketmoqchi emas", deb ranjigan ko‘yi yozadi u internetdagi sahifasida.
Jamoa bilan shartnomasi 2016 yilning yoziga qadar tuzilgan Aleksandr Kerjakovga "Zenit 2" jamoasida o‘ynash taklif qilingan va futbolchi bu taklifni qabul qilgan.
Arshavin esa bu vaziatga bosiqlik bilan yondashdi.
"Jamoa rahbariyatiga men bilan o‘ta saxiy tarzda munoasabda bo‘lishgani uchun o‘z minnatdorchiligimni bildiraman. Shuningdek, muxlislarga ham doimo qo‘llab-quvvatlab turishgani uchun rahmat. Agar o‘yinlarim bilan ularni ranjitgan bo‘lsam, buning uchun uzr so‘rayman. Kerjakovga esa yangi jamoada omad tilayman", deya fikr bildiradi Arshavin bu voqealardan keyin.
"Zenit" Arshavin va Timoshchukka jamoa tizimidan ish taklif etgani haqida xabarlar mavjud.