Rossiyada Temur yurishlarining tarixi o‘rganilmoqda

Rossiyaning Lipetsk viloyatida “Amir Temur izlari bo‘ylab” nomli arxeologik ekspeditsiya olib borilmoqda. Ekspeditsiya rahbari Igor Kozmirchukning so‘zlariga qaraganda, shahar xarobalarini o‘rganishning dastlabki kunlarida qiziqarli topildiqlar aniqlandi. Jumladan, mudofaa devorlari vayronalari ostida qabr topildi.

Gorod48.ru sayti Kozmirchukning so‘zlarini keltiradi:
“Qabrda odamning yarmigina dafn etilgan, xolos. Ya'ni ikkiga bo‘lib yuborilganga o‘xshaydi. Bu fikrni antropologlar tekshirib ko‘radi, ular yaqinda yetib kelishadi. Aftidan, bu ikkiga bo‘lib tashlangan jangchilardan biridir. Bu shahar ostonalarida bo‘lgan jangdan dalolatdir. Hozircha 1395 yilgi jang shu yerda bo‘lganini isbotlab berish oldimizda turgan vazifalardan biridir”.

“Qizig‘i shundaki, eng mashhur ensiklopediyalarda, jumladan, Britannica va Iranica’da va ko‘plab tarix darsliklarida Temur 1395 yili Moskvani egallagani aytiladi, – davom etadi so‘zida arxeolog. – Ammo Temur tomonidan amalga oshirilgan vayronagarchilik izlari Moskvada topilmadi. Ular hech qachon aniqlanmasa ham kerak, negaki, fors solnomalariga ko‘ra, uning qo‘shinlari o‘sha yili Yeletsdan shimolga o‘tmagan va Okadan kechib o‘tmagan. Bugungi kunga qadar Lipetsk viloyatida ham Temur istilosi izlari topilmagan, ammo Temur avangardining Bekyoruq o‘g‘lon qo‘shini bilan qayerda urushganining lokalizatsiya qilinishi, Qorasuv va Muskuvning lokalizatsiyasi bunday izlarning topilishiga olib kelishi mumkin”.