15:34 / 09.07.2015
4929

Samvel Babayan: Menga hammaning yordami kerak

9 iyul, payshanba kuni O‘FF majlislar zalida O‘zbekiston milliy va olimpiya terma jamoalari bosh murabbiylari ishtirokida matbuot anjumani bo‘lib o‘tdi.

Tadbirda O‘zbekiston terma jamoasi bosh murabbiyi Samvel Babayanga so‘z berildi.

“Terma jamoa bosh murabbiyi sifatida tayinlanishim men uchun ham kutilmagan bo‘ldi. Birgalikda harakat qilsak oldimizga qo‘yilgan vazifalarni uddalay olamiz deb o‘ylayman. Eng avvalo hozir guruhimizda birinchi o‘rin olish va keyingi bosqichga yo‘l olishga e'tibor qaratishimiz kerak”, dedi milliy terma jamoa bosh murabbiyi.

Murabbiy o‘rtoqlik uchrashuvlari haqidaga savolga javob berarkan, shunday dedi: “Kuchli raqiblar bilan o‘yin o‘tkazishni istaymiz. Ammo maqsad kuchli raqib bilan o‘ynash emas saralashdagi raqiblarimizga o‘xshaydigan jamoalar bilan o‘ynashimiz kerak. Bir soat oldin O‘FF prezidenti bilan gaplashdik. Mirabror Usmonov bu borada barcha kerakli sharoitlarni yaratib berayaptilar”.

Texnik direktor lavozimida ish boshlagan serbiyalik mutaxassis yana O‘zbekistonda ish boshlaganidan mamnun ekanini bildirdi.

“Men o‘zbek futboliga yordam berish uchun keldim. Men bu yerda turistmasman. Buxoro Samarqandni ko‘rib bo‘lganman. Ishlash uchun kelganman. Men Samvel Babayan bilan ishlaganman va uning qanchalik talabchanligini bilaman. O‘zbekistonda yosh, iqtidorli futbolchilar juda ko‘p. Milliy terma jamoa – bu eng mihim bo‘g‘in. Men oldidan ko‘p gapirmoqchi emasman, men bu yerda yoshlar, olimpiya va milliy terma jamoani bog‘lab turadigan ko‘prik bo‘lmoqchiman. Bu borada tajribam yetarli”, dedi serbiyalik mutaxassis.

O‘zbekiston olimpiya terma jamoasi bosh murabbiyi Viktor Jalilov ham o‘zi boshchilik qiladigan terma jamoa va rejalar haqida so‘zlab o‘tdi.

“Olimpiya terma jamoasiga yaxshi va kuchli futbolchilarni jalb etamiz. Oldimizda katta tanlov bor. Barcha nomzodlarni diqqat bilan kuzatamiz va munosiblarini olimpiya terma jamoasiga jalb etamiz. Yosh iste'dodli futbolchilar ko‘p, biroq yoshlar tez-tez o‘zgarib turishadi. Shu bois bu borada ancha barcha jihatlarni e'tiborga olamiz. Aslida mendan oldingi murabbiylar katta hajmdagi ishni olib borishganini ta'kidlayman. Iyul oyidagi yig‘inimizga bir qator yangi futbolchilarni chaqirdik. Klublarida zaxirada qolib ketayotgan ba'zi futbolchilarga ham imkon beramiz. Hozir kengaytirilgan ro‘yxatimizda 50 nafar futbolchi bor”, - dedi Jalilov.

Milliy terma jamoa bosh murabbiyi Samvel Babayan ham olimpiya terma jamoasi bosh murabbiyi Viktor Jalilov ham o‘z oldilariga aniq vazifalar qo‘yilgani va ularni bajarish uchun ishga kirishganliklarini ta'kidlab o‘tishdi.

Top