Samarqand shahrida soxta aviakassa faoliyati fosh qilindi. Bu haqda “Huquq” gazetasi yozmoqda.
Aytilishicha, Farrux Anorov ismli shaxs Dahbed ko‘chasida bir xonani jihozlab, aviakassa tashkil qilgan. Lekin mijozlardan elektron aviachiptalar sotish bahonasida pul olib, aslida hech qanday chiptalar rasmiylashtirmagan. Jumladan, Obidjon Mamadaliyev va Burxon Sobirovlar Toshkent-Tyumen reysiga chipta buyurtma qilib, qallobga 352 dollardan pul berishgan. So‘ng Sharofiddin Usmonov, Nizomiddin Umrzoqov va Jumanqul Normatovlar Nyu-York reyslaridan biri uchun jami 9.5 mln so‘m to‘lagan.
Bir necha kundan so‘ng Nilufar Ibragimova Samarqand-Moskva reysi uchun 440 dollar, Zubayda Suvonova Toshkent-Istanbul reysi uchun 1 100 dollar to‘lagan.
Ammo bu fuqarolarning barchasi aldanganini bilib, tegishli tashkilotga murojaat qilishgan.
Soxta aviakassa yopildi, uning egasi esa 3 yil 3 oyga ozodlikdan mahrum etildi.
